Yəməndə partlayışlar nəticəsində 1 uşaq ölüb, 13 nəfər yaralanıb

Yəmənin müxtəlif şəhərlərində mina və müharibə qalıqlarının partlaması nəticəsində 1 uşaq ölüb, 13 nəfər yaralanıb.

Sonxeber.az xəbər verir ki, Yəmən Mina Rəsədxanasından verilən yazılı açıqlamada Hudeyde şəhərinin El-Hali mahalının Es-Salam məhəlləsində minanın partlaması nəticəsində 1 uşağın öldüyü, 1 uşağın isə yaralandığı bildirilib.

Səada, Cevf, Hacce və Lahıc şəhərlərində mina və sursatların partlaması nəticəsində 4-ü uşaq, 2-si qadın olmaqla 12 nəfər yaralanıb.

Açıqlamada bu məlumatların son 48 saat ərzində qeydə alındığı və partlayışlara görə heç kimin məsuliyyət daşımadığı bildirilib.

Məsələ ilə bağlı Yəmən hökumətindən heç bir açıqlama verilməyib.

Yəmən hökuməti və insan haqları təşkilatlarının hesabatlarına görə İranın dəstəklədiyi husilər 2014-cü ildə vətəndaş müharibəsi başlayandan bəri ölkə boyu 2 milyona yaxın mina basıb. Bu minalar minlərlə dinc sakinin ölümünə və ya yaralanmasına səbəb olub.

İnsan haqları təşkilatları Yəməndə əksəriyyəti qadın və uşaqların 8 mindən çox insanın minaların qurbanı olduğunu deyib.

Şəbnəm Lətifi

Telegramda izləyin