"İnanıram ki, qardaş Türkiyə tezliklə bu çətin günlərini arxada qoyacaq"- DEPUTAT

"Bu gün qardaş Türkiyə gözünü dəhşətli zəlzələ ilə açdı".

Bunu Sonxeber.az-a danışan deputat Cəbi Quliyev deyib.

Deputat qeyd edib ki, bu gün səhər saatlarında Türkiyənin müxtəlif bölgələrində növbəti dəfə güclü zəlzələ baş verib:

"7.7 bal gücündə baş vermiş zəlzələ nəticəsində ölənlərin sayı durmadan artır. Bu saata olan rəsmi məlumata görə 912 nəfər ölüb, 5385 şəxs yaralanıb. 2 min 470 nəfər dağıntılar altından xilas edilib. 2 min 818 bina isə dağılıb. Ümid edirəm ki, tezliklə qardaş Türkiyə bu çətin günləri arxada qoya biləcək".

Deputat vurğulayıb ki, Azərbaycan yenə də qardaşını tək qoymadı və ilk olaraq kömək əlini uzatdı:

"Cənab prezidentin tapşırığı ilə ilkin olaraq Fövqəladə Hallar Nazirliyinin 370 nəfərdən ibarət çevik xilasetmə qüvvələrinin qardaş ölkəyə yola düşməsi üçün hazırlıq işlərinə başlanılıb. Bundan əlavə ilkin yardım məqsədilə çadırlar, yataq dəstləri, tibbi ləvazimatlar və digər zəruri vasitələri hadisə yerinə çatdıracaq ikinci təyyarə də hazırlanır və ən qısa zamanda onun göndərilməsi nəzərdə tutulur. Əlbəttə, bu ilkin yardımlardır. Təbii fəlakətin nəticələrinin aradan qaldırılması üçün Azərbaycan qardaş ölkəyə lazım olan dəstəyini sona qədər verəcək".

Aysel Yusifqızı

Telegramda izləyin