Türkiyədəki hadisə "Ayla" filmini xatırlatdı - FOTO-VİDEO

Bildiyiniz kimi, fevralın 6-da qardaş Türkiyədə 7,7 və 7,6 bal gücündə baş verən dəhşətli zəlzələ 10 vilayətdə 13,5 milyon insana təsir göstərib, on minlərlə insanın ölümünə və xəsarət almasına səbəb olub. Dağıntılar altında qalan insanları xilas etmək üçün dünyanın müxtəlif yerlərindən xilasedicilər Türkiyəyə yardıma gəliblər. Onlar arasında Cənubi Koreyadan gələnlər də var.

BiG.AZ xəbər verir ki, koreyalı xilasedicinin dağıntılar altından çıxarılan türk uşağa su verməsi illər öncə türk əsgərinin koreyalı yetim uşağa sahib çıxmasını xatırladıb.

Koreyalı xilasedicinin görüntüləri real hadisələrə əsaslanan "Ayla" filmindən kadrlarla müqayisə olunub.

Digər paylaşımda Cənubi Koreyadan olan rəssamın keçmişi bu gün ilə müqayisə etdiyi bildirilir.

Qeyd edək ki, 1950-ci ildə Koreya müharibəsində türk ordusunun tərkibində olan Süleyman adlı əsgər viran olan məntəqədə yetim qalan qız uşağına rast gəlir, ona Ayla adını verərək özü ilə aparır. Uşağa atalıq edən Süleyman ona çox bağlanır, lakin Türkiyəyə qayıtmaq istədikdə Aylanı özü ilə aparmaq üçün hər yola əl atsa da, Koreya qanunlarını aşa bilmir. O, uşağı Koreyadakı yetim evinə vermək məcburiyyətində qalır və illərlə uşağın həsrəti ilə yaşayır. Yalnız 60 il sonra Süleyman Aylanın izinə düşə bilir və onunla yenidən görüşür.

Telegramda izləyin