İsrail qüvvələri cümə namazına gələnlərə Məscidül-Əqsanın qapısında hücum edib

İsrail qüvvələri Şərqi Qüdsdəki Məscidül-Əqsaya cümə namazı qılmaq üçün gələnlərə hücum edib.

Sonxeber.az xəbər verir ki, Fələstin Qızıl Aypara Cəmiyyətindən verilən açıqlamaya görə İsrail polisi bir nəfərə hücum edib və xaos yaşanıb.

On minlərlə fələstinli və əcnəbi müsəlman cümə namazını qılmaq üçün hər həftə olduğu kimi Məscidül-Əqsaya axışıb.

Məscidül-Əqsanın girişlərindən biri olan Əl-Əsbat Qapısında bir çox İsrail polisi müqəddəs məbədə girənlərin kimliyini yoxlamağa başlayıb.

İsrail qüvvələrinin gözyaşardıcı qazla müdaxiləsi nəticəsində bir nəfərin ayağı sınıb. Qeyd olunub ki, xəsarət alanlar müalicə olunmaq üçün xəstəxanaya yerləşdirilib.

Sosial mediada paylaşılan görüntülərdə bir nəfərin aldığı zərbə nəticəsində başından qan axdığı görülüb.

Fələstin mediası hadisələrdə İsrail polisinin 1 nəfəri saxladığını açıqlayıb.

Telegramda izləyin