Artıq çəkinin psixoloji səbəbləri nədir?

Müasir dünyada tez-tez artıq çəki problemi ilə qarşılaşırıq. Artıq çəkinin olması və olmaması fərdi bir məsələdir. Bəzi insanlar 10-15 kiloqram artıq çəki ilə özünü normal hiss edə bilər, bəziləri isə əlavə bir kiloqramla belə özünü yaxşı hiss etmir. Artıq kilolar həqiqətən insan sağlamlığı üçün problem yarada bilər. Fiziki sağlamlığa təsirdən əlavə, piylənmə həm də mövcud olan psixoloji problemləri ağırlaşdıra bilər.
Bu barədə Sonxeber.az-a açlıqlamasında psixoloq Sevinc Həbibova danışıb.
Onun sözlərinə görə, əgər artıq çəki psixosomatikadan (psixoloji, emosional və sosial hadisələrin bədən xəstəlikləri ilə əlaqəsini öyrənən elm) qaynaqlanırsa və "zehni yaralar" heç vaxt müalicə olunmursa, bu, ciddi yemək pozğunluqlarına – anoreksiya və bulimiyaya səbəb ola bilər.
Bəs artıq çəkinin psixoloji səbəbləri nədir?
Sualı cavablandıran psixoloq bunun bir neçə əsas psixoloji səbəbinin olduğunu bildirib:

1. Yemək antidepressant olur. Çoxları üçün sevimli yemək əsəb gərginliyini aradan qaldırmağın ən əlverişli yoludur. Bu vəziyyətdə stresin çəkiyə təsiri göz qabağındadır. Lakin gərginliyi başqa yollarla idarə etməyi öyrənməlisiniz.
2. Özünü aşağı qiymətləndirmək. Çox vaxt uşaqlıqda özünə hörməti aşağı olan insanlar daha çox kilolu olur və ya yetkin yaşlarında piylənmədən əziyyət çəkirlər.
3. Məsuliyyət hissinin aşağı səviyyədə olması. Bütün dərdlərində başqalarını və ya xarici şərtləri günahlandıran bu kateqoriya insanlar da risk altındadır. Tədqiqatçıların müşahidələrinə görə, onların çəkisi tez-tez artır.
4. Müsbət emosiyaların çatışmazlığı. İnsan qida vasitəsilə mənfi emosiyalardan qurtulur. Nəticədə - əlavə çəki kifayət qədər tez yığılır.
5. Günahkarlıq hissi. Çox vaxt özünü nədəsə günahkar hiss edib, əzab çəkən insanlar şüuraltı olaraq artıq çəki qazanmaqla özlərini cəzalandırırlar. Lakin nəticədə, bu, onlara mənəvi rahatlıq vermir və sağlamlıq problemləri daha da artır.
6. Qoruma ehtiyacı. Bu, bəlkə də, insanların kökəlməsinin ən çox yayılan səbəbidir. Şüuraltı səviyyədə bir insan təhlükəsiz olduğuna inanmırsa, bir qayda olaraq yeməyə söykənməyə başlayır və sonradan qazanılmış kiloqramlar qoruyucu bir qabıq rolunu oynayır.
7. Özünə əhəmiyyət əlavə etmək ehtiyacı. Çox vaxt vəzifəyə keçəndən sonra bir çox insan "nüfuzlu şəxs" kimi görünməsi üçün kilo alır. Eyni şey övladları onlara itaət etməyən valideynlərlə də baş verə bilər: öz səlahiyyətlərini artırmaq üçün bilmədən kökələ bilərlər.
Belə hallarda artıq çəki və ya piylənmədən qurtulmaq yalnız psixoloqla işləmək sayəsində mümkündür.

Telegramda izləyin