ABŞ Rumıniyada "F-16" qırıcılarını yerləşdirəcək

ABŞ hava məkanının təhlükəsizliyini təmin etmək üçün Rumıniya ərazisində bir neçə "F-16" döyüş təyyarəsi yerləşdirməyə qərar verib.

Verilən məlumatlara əsasən Rumıniyada tapılan pilotsuz uçuş aparatının (PUA) qalıqları ilə bağlı insident bu ölkənin xarici işlər naziri Luminitsa Odobesku ilə ABŞ dövlət katibi Antoni Blinken arasında telefon danışığı zamanı müzakirə olunub.

"Onlar həmçinin hava məkanının təhlükəsizliyini qorumaq üçün ikitərəfli əməkdaşlığın gücləndirilməsi vasitələrini müzakirə ediblər, bu kontekstdə ABŞ Hərbi Hava Qüvvələrinə məxsus "F-16" təyyarələrinin Rumıniya ərazisinə yerləşdirilməsi qeyd edilib", - deyə məlumatda bildirilir.

Qeyd olunur ki, Rumıniya diplomatiyasının rəhbəri ABŞ-nin dəstəyini alqışlayıb və NATO-nun Qara dənizdə və regionda baş verən hadisələrə qarşı ayıq-sayıqlığının vacibliyini vurğulayıb.

Xatırladaq ki, sentyabrın 6-da Rumıniyada Ukrayna ilə sərhədə yaxın ərazidə pilotsuz təyyarənin hissələri aşkar edilib. Pilotsuz təyyarənin bir neçə hissəsi Tulça bölgəsinin Plauru yaşayış məntəqəsinin yaxınlığında tapılıb.

Telegramda izləyin