Birinci Qarabağ müharibəsində itkin düşmüş döyüşçü ilə Füzulidə vida mərasimi keçirilir - FOTO

Azərbaycan Ordusunun Birinci Qarabağ müharibəsində itkin düşən döyüşçüsü Şəmsəddin Allahverdiyevlə 30 il sonra Füzuli rayonunda vida mərasimi keçirilir.

"Report"un Qarabağ bürosunun verdiyi xəbərə görə, mərasimdə şəhidin ailə üzvləri, yaxınları, rəsmi şəxslər, ictimaiyyət nümayəndələri iştirak edirlər.

Vida mərasimindən sonra şəhid rayonun Mahmudlu kənd qəbiristanlığında dəfn ediləcək.

Qeyd edək ki, Allahverdiyev Şəmsəddin Əvəz oğlu 1971-ci il iyulun 1-də Füzuli rayonunun İşıqlı kəndində anadan olub. Yaxınlarının bildirdiyinə görə, ərazi özünümüdafiə dəstələri yaranan ilk gündən könüllü olaraq ordu sıralarına yazılıb. Bir çox hərbi əməliyyatlarda və erməni silahlı birləşmələrinin azərbaycanlıların yaşadığı yaşayış məntəqələrinə hücumlarının qarşısının alınmasında iştirak edib. Ş.Allahverdiyev 1993-cü il mart ayının 27-də Füzuli rayonu Cuvarlı kəndi istiqamətində gedən döyüşlərdə itkin düşüb.

2020-ci ilin 44 günlük Vətən müharibəsi ilə torpaqlarımız işğaldan azad olunandan sonra həmin ərazilərdə azərbaycanlıların kütləvi şəkildə basdırıldığı məzarlıqlar aşkarlanıb.

Ekspertiza nəticəsində meyit qalıqlarından birinin Ş.Allahverdiyevə məxsus olduğu təsdiqlənib.

Telegramda izləyin