"Emosiyaları gizlətmək vəziyyəti daha da dərinləşdirir və insanı tükənməyə gətirib çıxarır" - AÇIQLAMA

Sosial mediada hər kəs xoşbəxt görünür — gülümsəyən şəkillər, motivasiya dolu statuslar, "hər şey qaydasındadır" mesajları… Amma bu parlaq görüntülərin arxasında çox zaman görünməyən bir həqiqət gizlənir: daxildə dağılmış, lakin xaricən "yaxşıyam" deməyə məcbur olan insanlar.

Bəs görəsən buna səbəb nədir?

Psixoloq A.Orucova bu barədə Sonxeber.az -a açıqlama verib:

"Maskalanmış depressiya yaşayan insanlar əslində kədər, boşluq və mənasızlıq hissləri ilə mübarizə aparsalar da, bu hissləri göstərməkdən çəkinirlər. Bu insanlar çox vaxt ‘mən zəif görünməməliyəm’ düşüncəsi ilə yaşayırlar. Cəmiyyətin gözündə ‘güclü’, ‘pozitiv’ olmaq təzyiqi o qədər artıb ki, insanlar öz ağrılarını gizlətməyi bacarıq kimi görürlər. Sosial mediada da hər kəs xoşbəxtliyini nümayiş etdirdiyi üçün, real hisslərini paylaşmaq sanki ‘uyğunsuz davranış’ sayılır."

Psixoloqun sözlərinə görə, bu hal tədricən insanın daxili dünyasında təcrid hissini gücləndirir:

"İnsan həm kədərini paylaşa bilmir, həm də ətrafın xoşbəxt görünməsi onda ‘məndə nəsə problem var’ düşüncəsini yaradır. Halbuki bu, çox yanlış yanaşmadır — çünki kədər və çarəsizlik hissi insan təbiətinin bir hissəsidir."

Mütəxəssis əlavə edir ki, emosiyaları gizlətmək vəziyyəti daha da dərinləşdirir və insanı tükənməyə gətirib çıxarır:

"İnsan ağrısını danmağa çalışdıqca, bədən və beyin onu başqa formalarda — yuxusuzluq, əsəb, diqqət dağınıqlığı və ya fiziki ağrılarla ifadə edir. Ona görə ‘yaxşıyam’ demək əvəzinə, ‘dərdim var’ demək bəzən daha sağaldıcıdır."

Telegramda izləyin