Autizmli şagirdlər məktəbdə iplə bağlandı - Təhsil Nazirliyi dərhal hərəkətə keçdi

Bursanın Osmangazi rayonunda fəaliyyət göstərən BTSO Baha Cemal Zağra Xüsusi Təhsil Tətbiq Məktəbində autizmli şagirdlərin dərs zamanı partalara iplə bağlandığını göstərən görüntülər böyük narazılıq yaradıb.

Sonxeber.az türk mediasına istinadən xəbər verir ki, sözügedən kadrlar məktəbdə övladı təhsil alan bir valideyn tərəfindən mobil telefonla qeydə alınıb. 9-16 yaş arası xüsusi qayğıya ehtiyacı olan uşaqların təhsil aldığı məktəbdə baş verən hadisə ilə bağlı İl Təhsil İdarəsi tərəfindən araşdırma başladılıb.

Hadisə ilə bağlı danışan valideyn Tülay Gürel, şagirdlərin həm söyüş və təhqir, həm də fiziki məhdudlaşdırmaya məruz qaldığını bildirib:

"Şəhərimizdə kifayət qədər xüsusi təhsil mərkəzi var. Amma təəssüf ki, bəzi müəllimlərin həm təcrübəsiz, həm də bu uşaqlar haqqında kifayət qədər məlumatlı olmaması ciddi fəsadlara yol açır. Bu səbəbdən övladlarımız böyük çətinliklər yaşayır. Söyüşdən tutmuş iplə bağlanmaya qədər hər şey edilir. Buna təcili şəkildə tədbir görülməlidir".

Tülay Gürel uşaqların uyğun olmayan şəraitdə təhsil aldığını vurğulayaraq əlavə edib:

"Bu uşaqların sakit və xüsusi şəraitli məktəblərdə oxuması vacibdir. Təəssüf ki, bəzi müəllimlər uşaqlara davamlı olaraq mənfi reaksiya göstərirlər. Mənim övladım 11 yaşında və autizmli bir uşaqdır. Konya şəhərində oxuduğu dövrdə rəsmlər çəkirdi. Şəhər dəyişəndən sonra problemlər başladı. Məktəbə aparırıq, amma valideynlərin içəri girməsinə icazə verilmir. Uşağın uyğun olmayan mühitdə olması ona ciddi ziyan vurur. Təəssüf ki, bəzən müəllimlər gücləri çatmadığı üçün uşaqları idarə etmək məqsədilə bağlayırlar".

Məsələ ilə bağlı Təhsil Nazirliyinin araşdırmasının davam etdiyi bildirilir.

Telegramda izləyin