"Aİ Venesuela dosyesini bağlamır, sadəcə dondurulmuş vəziyyətdə saxlayır" - AÇIQLAMA

Avropa İttifaqı (Aİ) Şurası Venesuelaya qarşı məhdudlaşdırıcı tədbirlərin müddətini 10 yanvar 2027-ci ilə qədər uzatmaq qərarına gəlib.

Sənəddə qeyd edilib ki, hazırda siyahıda aktivləri dondurulmalı olan 69 nəfər var. Onlara birbaşa və ya dolayı yolla vəsait, eləcə də, iqtisadi resurslar təqdim etmək qadağandır. Həmçinin, onlara Avropa İttifaqına səfərlərə qadağa tətbiq olunur.

"Aİ-nin Venesuelaya qarşı sanksiyaları uzatması Brüsselin bu ölkə ilə bağlı mövqeyinin dəyişmədiyini açıq göstərir, - bunu Sonxeber.az -a açıqlama verən politoloq Tural İsmayılov deyib:

"69 nəfərin aktivlərinin dondurulması və səyahət qadağası hədəfli təzyiq mexanizmi kimi təqdim olunur. Yəni Aİ deyir ki, problem Venesuela xalqı deyil, siyasi elitanın davranışıdır. Amma açıq danışaq, bu cür sanksiyalar indiyə qədər real siyasi transformasiya yaradmayıb. Maduro hakimiyyəti illərdir bu təzyiqlərlə yaşamağı öyrənib. Sanksiyaların uzadılması daha çox prinsipial mövqenin qorunmasıdır, nəticə istehsalı yox. Aİ geri çəkilsə, bu, normativ güc iddiasına ciddi zərbə olar. Ona görə də Brüssel xətti dəyişmir, hətta effekt zəif olsa belə. Silah embarqosu isə Venesuelanın təhlükəsizlik sahəsində manevr imkanlarını məhdudlaşdırmağa hesablanıb. Bu, eyni zamanda regionda potensial gərginlik risklərini nəzarətdə saxlamaq məqsədi daşıyır. Digər tərəfdən, Rusiya və Çin kimi aktorlar bu boşluğu rahatlıqla doldurur. Yəni Qərb təzyiq edir, amma alternativlər də paralel açıq qalır. Bu vəziyyət sanksiyaların geosiyasi təsirini nisbi edir. Nəticə etibarilə, Aİ Venesuela dosyesini bağlamır, sadəcə dondurulmuş vəziyyətdə saxlayır"

Qeyd edək ki, Aİ Venesuelaya qarşı məhdudlaşdırıcı tədbirləri 2017-ci ilin noyabrında tətbiq edib. Bu tədbirlərə ölkəyə silah tədarükünə embarqonu nəzərdə tutur.

Telegramda izləyin