Sıla Gençoğlunun narkotik testi mənfi çıxdı: "Mən özümdən əmin idim"

Türkiyəli tanınmış müğənni Sıla Gençoğlu barəsində aparılan narkotik araşdırması çərçivəsində verdiyi testin nəticəsi mənfi olub. Məhkəmə-Tibbi Ekspertiza Qurumunun təqdim etdiyi rəyə əsasən, sənətçinin narkotik vasitələrdən istifadə etmədiyi təsdiqlənib.

Sonxeber.az türk mediasına istinadən xəbər verir ki, ekspertiza rəyinin açıqlanmasının ardından ilk dəfə məsələ ilə bağlı danışan Sıla, ictimaiyyətə ünvanladığı açıqlamada proses boyu özünə inandığını bildirib.

"Mən özümdən əmin idim. Həyatım boyu gənclərə və cəmiyyətə nümunə olmağa çalışmışam. Ədalətin öz yerini tapacağına inanırdım. Aparılan hüquqi prosesdən alnımın ağı ilə çıxdığım üçün rahatam", - deyə müğənni bildirib.

Sıla qeyd edib ki, haqqında yayılan iddiaların onu və yaxınlarını mənəvi cəhətdən sarsıtsa da, həqiqətin ortaya çıxacağına hər zaman inanıb.

Qeyd edək ki, müğənninin adı narkotik araşdırması çərçivəsində hallanmış, bu səbəbdən ondan ifadə alınmış və narkotik testi verilməsi tələb olunmuşdu. Məhkəmə-Tibbi Ekspertiza Qurumunun rəsmi rəyinə əsasən, testin nəticəsi mənfi çıxıb və Sılanın narkotik vasitələrdən istifadə etmədiyi təsdiqlənib. Bundan sonra sənətçi ilk dəfə ictimaiyyət qarşısında açıqlama verərək prosesə münasibətini bölüşüb.

Telegramda izləyin