İrem Helvacıoğlu Ahbapla bağlı istintaqda ifadə verib

Türkiyəli aktrisa İrem Helvacıoğlu İstanbul Baş Prokurorluğunun Ahbap Dərnəyi ilə bağlı apardığı istintaq çərçivəsində "məlumat sahibi" qismində ifadə verib.

Helvacıoğlu ifadəsində bildirib ki, Ahbap Dərnəyinin rəhbəri Haluk Leventi 2021-ci ildə İzmir meşə yanğınları zamanı tanıyıb, lakin son 2-3 ildə onunla heç bir əlaqəsi olmayıb.

Bu barədə Sonxeber.az xarici mediaya istinadla xəbər verir.

Aktrisa qeyd edib ki, zəlzələ dövründə dərnəyə maddi ianə etməyib, yalnız uşaq bezləri və digər zəruri ləvazimatların təmin olunması üçün şirkətlərlə əlaqə yaradaraq vasitəçilik edib. Satınalma və çatdırılma prosesinin isə dərnək əməkdaşları tərəfindən həyata keçirildiyini deyib.

İrem Helvacıoğlu əlavə edib ki, yardımların həqiqətən ehtiyacı olan insanlara çatıb-çatmadığını könüllülərin bilməsi mümkün deyil. O, dövlət qurumlarını heç vaxt hədəf almadığını, əksinə, AFAD və Qızıl Aypara da daxil olmaqla rəsmi qurumların fəaliyyətini dəstəklədiyini vurğulayıb.

Aktrisa bildirib: "Əgər yardıma ehtiyacı olan insanlar üçün ayrılan vəsaitlər mənimsənilibsə, günahkarların cəzalandırılmasını ürəkdən istəyirəm."

Telegramda izləyin