Honkonqda kriptovalyuta şirkətinin əməkdaşı fırıldaqçıların qurbanı olaraq 500 min dollardan çox pul itirib

Honkonqda kriptovalyuta mübadiləsi şirkətinin əməkdaşı "WhatsApp" messencerində saxta işçi qrupu yaradılması yolu ilə həyata keçirilən dələduzluq nəticəsində 4 milyon Honkonq dollarından çox, təxminən 500 min ABŞ dolları itirib.
Bizimyol.info xəbər verir ki, polis son iki həftə ərzində oxşar üsulla törədilmiş 150-dən çox hadisəni qeydə alıb. Dəymiş ümumi zərər 15 milyon Honkonq dollarını ötüb.

Hadisə zamanı zərərçəkən əməkdaş "WhatsApp" vasitəsilə həmkarları və bir neçə müştərisi ilə ünsiyyət saxlayıb. Onun hesabına giriş əldə edən fırıldaqçılar əvvəlcə mövcud işçi qrupunu bloklayıb, daha sonra zərərçəkənin həmin şəxslərlə messencer vasitəsilə əlaqə saxlamasının qarşısını almaq üçün bütün iştirakçıları qara siyahıya əlavə ediblər.

Bundan sonra dələduzlar qrupun adını, şəklini, iştirakçıların profil fotolarını və siyahısını olduğu kimi köçürərək yeni söhbət qrupu yaradıblar. Saxta qrupda cinayətkarlardan biri özünü müştəri kimi təqdim edərək kriptovalyuta mübadiləsi ilə bağlı adi sorğu göndərib.

Şirkətin əməkdaşı əməliyyatı standart prosedura uyğun həyata keçirib. O, müştərinin hesabından müvafiq məbləği sonradan çıxacağını düşünərək kriptovalyutanı göstərilən elektron pul kisəsinə köçürüb.

Lakin müştərinin hesabında kifayət qədər vəsait olmadığı məlum olduqda əməkdaş şübhələnib. O, müştəriyə birbaşa zəng edərək məsələni dəqiqləşdirib. Müştəri isə kriptovalyuta mübadiləsi ilə bağlı heç bir sorğu göndərmədiyini bildirib.

Aparılan yoxlama nəticəsində yeni söhbət qrupundakı bütün iştirakçıların saxta hesablar olduğu üzə çıxıb. Həmçinin əməkdaşın "WhatsApp" hesabının ona tanış olmayan bir cihazla əlaqələndirildiyi müəyyən edilib. Bu fakt dələduzların müəyyən müddət ərzində onun hesabına nəzarət etdiyini göstərib.

Daha əvvəl bir kriptovalyuta treyderinin "Cloudflare" sisteminin saxta yoxlama prosedurundan keçdikdən sonra təxminən 600 min ABŞ dolları itirdiyi barədə məlumat yayılmışdı.

Telegramda izləyin