9 Noyabr - Dövlət Bayrağı Günü: Üçrəngli bayrağımız milli qürurumuzun, dövlət müstəqilliyimizin və Zəfərimizin rəmzidir

Azərbaycan xalqının milli kimliyini, dövlətçilik ənənələrini, azadlıq və müstəqillik ideallarını özündə birləşdirən üçrəngli Dövlət Bayrağımız xalqımızın ən müqəddəs milli dəyərlərindən biridir. Hər il noyabrın 9-da qeyd olunan Dövlət Bayrağı Günü Azərbaycan tarixinin şanlı səhifələrini, müstəqillik uğrunda aparılan mübarizəni və xalqımızın azadlıq iradəsini bir daha xatırladır. Bu bayram yalnız dövlət rəmzinə ehtiram günü deyil, həm də milli birliyimizin, tarixi yaddaşımızın və gələcəyə inamımızın təcəssümüdür.

Azərbaycanın üçrəngli bayrağı 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə dövlət bayrağı kimi qəbul edilib. Bu qərar xalqımızın müstəqil dövlət qurmaq iradəsinin, milli özünüdərkinin və dünyaya öz dövlətçilik kimliyi ilə çıxmaq istəyinin ifadəsi idi. Mavi rəng türkçülüyü, qırmızı rəng müasirliyi, demokratiyanı və inkişafı, yaşıl rəng isə islam sivilizasiyasına mənsubluğu ifadə edir. Aypara və səkkizguşəli ulduz isə bayrağımızın mənəvi və tarixi rəmzlərini tamamlayır.

1920-ci ildə Azərbaycan Xalq Cümhuriyyətinin süqutundan sonra üçrəngli bayrağımız dövlət atributu kimi istifadədən çıxarılsa da, xalqımızın yaddaşında və müstəqillik arzularında yaşamaqda davam etdi. 1990-cı il noyabrın 17-də Naxçıvan Muxtar Respublikası Ali Məclisinin ulu öndər Heydər Əliyevin rəhbərliyi ilə keçirilən sessiyasında üçrəngli bayraq Naxçıvanın dövlət bayrağı kimi qəbul edildi və onun Azərbaycanın dövlət bayrağı kimi qəbul olunması barədə qərar verildi. Bu, müstəqilliyə aparan yolda tarixi əhəmiyyət daşıyan siyasi addım idi.

Azərbaycan dövlət müstəqilliyini bərpa etdikdən sonra üçrəngli bayrağımız ölkəmizin əsas dövlət rəmzlərindən birinə çevrildi. Ulu öndər Heydər Əliyevin müəyyən etdiyi dövlətçilik strategiyası milli atributlara ehtiramın, azərbaycançılıq ideologiyasının və dövlət müstəqilliyinin möhkəmləndirilməsinin əsas istiqamətlərindən biri oldu. Bu siyasi kurs Prezident İlham Əliyev tərəfindən uğurla davam etdirilərək müasir Azərbaycanın inkişafında mühüm rol oynadı.

Bu gün Dövlət Bayrağımızın ucalığı həm də Azərbaycanın beynəlxalq nüfuzunun, siyasi müstəqilliyinin və iqtisadi gücünün göstəricisidir. Ölkəmizin müxtəlif beynəlxalq tədbirlərdə, idman yarışlarında və diplomatik platformalarda bayrağımızın dalğalanması hər bir azərbaycanlıda qürur hissi yaradır. Lakin üçrəngli bayrağımızın ən böyük mənəvi təntənəsi işğaldan azad edilmiş torpaqlarımızda yenidən ucaldılması ilə bağlıdır.

44 günlük Vətən müharibəsində Azərbaycan Ordusunun qazandığı tarixi Zəfər dövlət bayrağımızın rəmzi mənasını daha da gücləndirdi. Prezident, Müzəffər Ali Baş Komandan İlham Əliyevin rəhbərliyi ilə Azərbaycan öz ərazi bütövlüyünü bərpa etdi. Şuşada, Cəbrayılda, Füzulidə, Zəngilanda, Qubadlıda, Laçında və digər azad edilmiş ərazilərimizdə üçrəngli bayrağımızın dalğalanması onilliklər boyu davam edən həsrətin sona çatmasının, tarixi ədalətin bərpasının və milli iradənin təntənəsinin ifadəsi oldu.

2023-cü ilin sentyabrında həyata keçirilən lokal xarakterli antiterror tədbirlərindən sonra Azərbaycanın bütün ərazisində dövlət suverenliyinin tam bərpası bayrağımızın dövlətçilik tarixindəki rəmzi əhəmiyyətini daha da artırdı. Bu gün Azərbaycan bayrağı ölkəmizin bütün ərazisində suveren dövlətin qüdrətini və milli birliyini nümayiş etdirir.

Prezident İlham Əliyevin dövlət bayrağına göstərdiyi xüsusi diqqət və ehtiram dövlətçilik siyasətinin mühüm tərkib hissəsidir. Dövlət başçısının çıxışlarında bayrağımızın müstəqilliyimizin, milli qürurumuzun və xalqımızın birliyinin rəmzi kimi təqdim olunması gənc nəslin vətənpərvərlik ruhunda yetişdirilməsi baxımından da mühüm əhəmiyyət daşıyır.

Dövlət Bayrağı Günü hər bir vətəndaşa xatırladır ki, müstəqillik yalnız tarixi nailiyyət deyil, həm də qorunmalı və inkişaf etdirilməli olan milli sərvətdir. Bayrağa hörmət dövlətə, Vətənə, xalqın tarixinə və gələcəyinə hörmət deməkdir. Bu baxımdan üçrəngli bayrağımızın gənclər arasında təbliği, milli-mənəvi dəyərlərin qorunması və dövlətçilik ənənələrinin gələcək nəsillərə ötürülməsi xüsusi əhəmiyyət daşıyır.

Bu gün Azərbaycan bayrağı azadlığımızın, birliyimizin, suverenliyimizin və Zəfərimizin rəmzi kimi yüksəklərdə dalğalanır. Onun hər dalğalanışı müstəqillik uğrunda mübarizə aparmış insanların xatirəsini, şəhidlərimizin müqəddəs amalını və qazilərimizin qəhrəmanlığını yaşadır.

Üçrəngli bayrağımız bizim milli kimliyimiz, dövlətçilik qürurumuz və gələcəyə inamımızdır. Bu bayraq daim yüksəklərdə dalğalansın!

Musa Quliyev
Milli Məclisin deputatı

Telegramda izləyin