Azərbaycanda kişi sevgilisi ilə onun tanışının intim görüntülərini çəkərək şantaj edib

Tərtərdə hədə-qorxu ilə tələb etmədə təqsirləndirilən Kamil Bayramov və Leyla Mayılova (ad, soy adı şərti) barələrində olan hökmdən verilən apellyasiya şikayəti və apellyasiya protesti üzrə məhkəmə iclası başa çatıb.

Hakim Çingiz Məmmədovun sədrliyi ilə keçirilən prosesdə qərar elan olunub.

Qərara əsasən, hər iki şikayət təmin edilməyib.

İttihama görə, hadisə 2020-ci ilin yanvar ayında Tərtər rayonu ərazisində qeydə alınıb.

Belə ki, K.Bayramov L.Mayılova ilə qeyri-rəsmi olaraq birgə nikahda yaşayıb.

İstintaq materiallarında qeyd edilib ki, o, qadınla qabaqcadan əlbir olaraq qrup halında birləşib.

Bildirib ki, 2020-ci ilin yanvar ayında K.Bayramov L.Mayılova ilə kirayədə yaşadıqları evdə qadınla onun tanışı M.M-in (ad, soy adı şərti) intim xarakterli videogörüntüsünü çəkib. Daha sonra onlar görüntüləri zərərçəkmişin özünə nümayiş etdiriblər.

Hər iki şəxs həmin videogörüntünü M.M-in yaxınlarına göstərəcəyi, eləcə də barəsində rüsvayedici məlumatlar
yayacağı ilə bağlı ona hədə-qorxu gəliblər.

Onlar 2020-ci ilin təxminən yanvar ayının ortalarından iyun ayına qədər olan
vaxt ərzində zərərçəkmişdən ümumilikdə 1470 manat nağd pulu hədə-qorxu yolu ilə keçiriblər.

Daha sonra M.M-in şikayəti əsasında saxlanılan K.Bayramovla L.Mayılova barədində Cinayət Məcəlləsinin 182.2.1-ci (Hədə-qorxu ilə tələb etmə, qabaqcadan əlbir olan bir qrup şəxs tərəfindən törədildikdə) maddələri ilə ittiham irəli sürülüb.

Gəncə Ağır Cinayətlər Məhkəməsinin hökmü ilə K.Bayramov 5 il 6 ay müddətində azadlıqdan mərhum edilib. Qadının barəsində isə 2 il müddətinə azadlığın məhdudlaşdırılması (elektron qolbaq) cəzası təyin olunub. Hökmdən narazı qalan dövlət ittihamçısı apellyasiya protesti və zərərçəkmiş isə apellyasiya şikayəti verib.

Qeyd: 1989-ci il təvəllüdlü K.Bayramov daha 2017-ci ildə Bakıda oğurluğa görə tutulub və 2 il məhkumluq həyatı yaşayıb./Pravda

Telegramda izləyin