"Xaliq Faiqoğlu"nda avtobus BÖHRANI: "Az qalıb, birdəfəlik bağlanacaq"

Bakıda fəaliyyət göstərən 9 nömrəli marşrut avtobusu ilə bağlı sərnişinlərin narazılığı səngimək bilmir. Paytaxtın yollarında tıxac olmayan saatlarda belə avtobusun dayanacaqlara təxminən bir saatlıq intervalla gəlməsi insanların səbrini tükəndirir, gündəlik gediş-gəlişini çətinləşdirir.

Sərnişinlərin sözlərinə görə, "Xaliq Faiqoğlu" şirkətinə məxsus sözügedən avtobus dünən sürətli hərəkət etdiyinə görə cərimələnib. İddialara görə, bundan sonra marşrut sanki insanlardan "küsüb".

Dayanacaqlarda bir saata yaxın avtobus gözləyən insanlar haqlı olaraq sual edirlər: bu gecikmələrin səbəbi nədir? Sürücüdən vəziyyətlə bağlı soruşduqda isə onlara "Az qalıb, birdəfəlik bağlanacaq" cavabı verilir.

Bəs sərnişinlərin günahı nədir? İnsanlar işə, dərsə, vacib görüşlərə vaxtında çatmaq üçün niyə saatlarla dayanacaqda gözləməli, üstəlik, bu cür cavablarla qarşılaşmalıdırlar? İctimai nəqliyyatın əsas vəzifəsi vətəndaşlara xidmət göstərmək deyilmi? Bir marşrutun fəaliyyəti ilə bağlı yaranan problemə görə əziyyət çəkən yenə də gündəlik həyatını avtobusdan asılı şəkildə quran insanlar olmamalıdır.

Məsələ ilə bağlı aidiyyəti quruma sorğu ünvanladıq.

"Xaliq Faiqoğlu" şirkətinin mətbuat katibi Nizam Rzayev BiG.AZ-a açıqlamasında bildirib ki, 9 saylı müntəzəm marşrut xəttində hazırda 12 avtobus sərnişinlərə xidmət göstərir:

"Nəqliyyat vasitələrindən 6-sı iritutumlu, digər 6-sı isə orta tutumludur. Xətt üzrə interval 10-12 dəqiqə müəyyən edilib.
Gün ərzində müşahidə edilən sıxlıq və tıxaclar, eləcə də digər məhdudiyyətlər bəzi hallarda interval pozulmalarına səbəb olur. Bu hal əsasən iş günlərində pik saatlarında müşahidə edilir. Xahiş edirik, məlumatları yayarkən şirkətin və rəsmi qurumların təqdim etdiyi rəsmi informasiyalara əsaslasınız".

Aynur Babazadə

Telegramda izləyin