Azərbaycanlı aparacı İran və Türkiyəyə səsləndi

Aparıcı Lalə Azərtaş sosial şəbəkə hesabında paylaşdığı videoda son günlər gündəmdə olan hadisələrlə bağlı fikirlərini bölüşüb.

Sonxeber.az xəbər verir ki, aparıcı paylaşımında izləyicilərindən mövzu ilə bağlı çoxsaylı suallar və mesajlar aldığını bildirib. O, baş verənlər fonunda Azərbaycanın daxili işlərinə müdaxilə cəhdləri kimi qiymətləndirdiyi hallara münasibət bildirib.

Lalə Azərtaş dinin pərdəsi altında bu cür yanaşmaların qəbuledilməz olduğunu vurğulayıb:

"Öz dünyagörüşü anlayışını əqidəsinə belə sığışdıra bilməyənlərin durub da kənardan Azərbaycanın daxili işlərinə burunlarını soxması nə qədər böyük təzaddır. Din pərdəsi altında bunun edilməsi ümumiyyətlə yol verilməzdir. Biz buna yol verə bilmərik. Biz bu cür təxribatlara, bu cür təhriklərə, bu cür provokasiyalara gedə bilmərik və getmərik", - deyə aparıcı bildirib.

O, Xəzər dənizinin sahilindən səsləndirdiyi fikirlərində Araz çayına da toxunaraq, çayın iki sahildə yaşayan insanların ağrılarını və səslərini daşıdığını ifadə edib. Azərtaş Azərbaycanın daxili məsələlərinə müdaxilə cəhdlərinin səbəbini sual altına alıb.

Aparıcı çıxışında milli birlik və dövlətə inam məsələsinə də diqqət çəkib. Onun sözlərinə görə, cəmiyyətin birliyi dövlətə sədaqət, milli maraqlara və milli iradəyə sahib çıxmaqla bağlıdır.

Lalə Azərtaş paylaşımının sonunda insanları birliyə çağırıb, təxribatlara uymamağa və cəmiyyətdə qarşıdurma yaratmağa yönələn cəhdlərə qarşı diqqətli olmağa səsləyib.

"Gəlin bir olaq, gəlin təxribatlara uymayaq, gəlin bizim içimizə yad ünsürlərin daxil olub aranı qatışdırmağa çalışmasının qarşısını alaq", - deyə o qeyd edib.

Telegramda izləyin