"Qiymət artımı hər yerdə müşahidə olunur" - Emin Qəribli

Deputat Tahir Rzayev bildirib ki, hazırda ölkədə satılan kənd təsərrüfatı məhsullarının qiymətində kəskin bahalaşma müşahidə olunur. Mövsümi meyvələrin qiyməti isə ötən illə müqayisədə ikiqat bahadır. Məhsulun bol olduğu deyilsə də, qiymətlər od tutub yanır.

Mövzuyla bağlı Sonxeber.az-a açıqlama verən iqtisadçı Emin Qəribli bildirib ki, bunun səbəbi qlobal inflyasiyadır:

"Bildiyimiz kimi, dünyada qlobal inflyasiya gedir. Buna təsir edən amillərdən biri təbii ki, pandemiyadır. Pandemiya dövründə müəyyən məhdudiyyətlər oldu və bu məhdudiyyətlər nəticəsində kənd təsərrüfatı məhsullarının istehsalı azaldı.İkinci səbəb dünyaya kifayət qədər əlavə pullar imisiya olundu. Bu isə pul kütləsinin artımına gətirib çıxardı. Üçüncü səbəb isə enerji daşıyıcılarının qiymətinin artımıdır. Nəticədə təbii ki, kənd təsərrüfatı məhsullarının qiymətinin artması gözlənilirdi və Azərbaycan da istisna olmadı. Bunun müsbət tərəfi budur ki, yerli kənd təsərrüfatı artdı. Bu, yerli kənd təsərrüfatı istehsalçıları üçün stimul olacaq, daha çox məfəət əldə etmək imkanına sahib olacaqlar. Dövlət də qiymət artımının qarşısına almaq üçün müvafiq tədbirlər görür, maaşlar və sosial rifah artırılır. İnflyasiya hər yerdə müşahidə olunur, ona görə onu qlobal adlandırmaq olar. Azərbaycan da qlobal iqtisadiyyatın tərkib hissəsi olduğuna görə təbii ki, bizdə də qiymətlər artır.

Qiymət artımının strukturuna baxsaq, orda sünilik elementləri də var, amma tam süni demək düzgün deyil. Süni olsaydı, həmin proses digər ölkələrdə olmazdı. Bütün dünyada bu proses gedir. Sadəcə bazar iqtisadiyyatının elə elementləri var ki, ondan sui-istifadə edirlər. Amma dövlət qurumları monitorinq aparırlar və buna qarşı tədbirlər görülməlidi. Bu vəziyyətdən istifadə edən fiziki və hüquqi şəxslər cəzalandırılmalıdı. Müəyyən subyektlərin qiyməti artırdığını demək düzgün deyil. Bu günki dünya iqtisadiyyatını təhlil etmək kifayətdir. Qiymət artımı bir ölkədə az, digərində nisbətən çox ola bilər. Amerika və Avropa ölkələrində də qiymət günü-gündən artır və obyektiv səbəbləri var".
Şəbnəm Lətifi

Telegramda izləyin