"YAŞAT" fondu xərclənən məbləği açıqladı

"Bu günə qədər "YAŞAT" fondunun bütün valyutalarda olan hesablarına 73 milyon 781 min 435.79 manat daxil olub. Bu məbləğin 61 milyon 114 min 757 manat 86 qəpiyi artıq xərclənib. Hazırda Fondun balansında 12 milyon 666 min 677.93 qəpik vəsait qalıb".

Sonxeber.az xəbər verir ki, bu sözləri YAŞAT fondunun rəhbəri Qarabağ qazisi Elvin Hüseynov bu gün keçirilən mətbuat konfransında deyib.

"Müharibə əlili və şəhid ailəsi üzvünün illik dərman limiti 1000 manat, onkoloji və hepatit xəstəlikləri üçün 5000 manat müəyyən olunub . Çünki onların dərmanları daha bahadır.

Ötən il İsraildən gələn hərbi xəsarətlərin müalicə edilməsi üzrə ixtisaslaşmış 8 mütəxəssis ağır göz problemləri olan 148 nəfəri müayinə edib. Müayinəyə əsasən 30 nəfər əməliyyat edilib, nəticədə 2 nəfərin görmə qabiliyyəti bərpa olunub. 55 nəfərə protez göz qoyulub, 82 nəfər isə sadəcə müayinə edilib.

Bundan başqa, ciddi fiziki travma alan yaralıların fiziki bərpa prosesini daha da sürətləndimək üçün "YAŞAT" Fondu xaricdən sifariş etdiyi 38 999.00 manat məbləğində "RGO" ortopedik cihazlarını ölkəyə gətirib. Avadanlıqdan 8 yaralının müalicəsində istifadə olunub. Gün ərzində 35-40 nəfər yaralının müalicə edilməsi üçün 47 200 manat məbləğində Giger MD reabilitasiya cihazı alınıb.

Həmçinin yeni doğulmuş şəhid övladlarının zəruri xərclərinin qarşılanması məqsədilə 1 000 AZN məbləğində maddi yardım edilib və həmin körpələrin hər birinin anasının bank hesabına 5000 AZN köçürülüb. Vəsait uşaq yetkinlik yaşına çatana qədər artan faizlə saxlanıla bilər".
Şəbnəm Lətifi

Telegramda izləyin