"Zəngilanın Ağalı kəndinə vətəndaşlarımızın köçürülməsi 4 mərhələdən ibarətdir" - Deputat

İyulun 19-da Azərbaycanın işğaldan azad edilmiş Zəngilan rayonunun Ağalı kəndinə əhalinin köçürülməsinə start verilib.

Bununla bağlı Sobxeber.az-a danışan deputat Cavanşir Paşazadə bildirib ki, bu gün 30 il doğma yurd-yuvalarına həsrət qalan soydaşlarımız öz vətənlərinə geri qayıdırlar:

"Azərbaycanda ilk dəfə "ağıllı kənd" konsepsiyası həyata keçirilib. Müasir standartlara cavab verən evlərdə vətəndaşlarımızın rahat yaşaması üçün hər bir şərait yaradılıb. Bilirsiniz, "Ağıllı kənd" konsepsiyasına uyğun qurulan Ağalı kəndinə vətəndaşlarımızın köçürülməsi 4 mərhələdən ibarətdir. Ümumilikdə Ağalı kəndində 41 ailənin, yəni təxminən 200 nəfərin hər cür şəraitlə təmin olunacağı gözlənilir. Ən önəmlisi isə odur ki, burada yaşayacaq əhalinin məşğulluq, sosial, təhsil, tibbi məsələləri müvafiq qurumlar tərəfindən həll ediləcək".

Deputat vurğulayıb ki, bu gün doğma yurdlarına köçürülən soydaşlarımızın fotolarına baxanda onların necə sevincli və xoşbəxt olduqları görülür:

"30 illik həsrət Ali Baş Komandan və Azərbaycanın Müzəffər Ordusu sayəsində sona çatıb. 90-cı illərin əvvəllərində ayaqyalın və göz yaşları içində Vətənini tərk edən vətəndaşlarımız bu gün böyük sevinc hissi ilə öz evlərinə geri qayıdırlar. Bu qürurverici sevinc hissini bizə yaşadan cənab Prezidentə, ərazi bütövlüyümüz uğrunda canlarından və sağlamlıqlarından keçməyə hazır olan Azərbaycanın mərd oğullarına, qazilərimizə təşəkkür edir, şəhidlərimizin ruhları önündə baş əyirəm.

Artıq illərin həsrəti sona yetir. Arzu edirəm ki, 30 il ərzində vətən həsrəti çəkən bu insanların evindən daim gülüş, toy-bayram səsləri eşidilsin".

Aysel Yusifqızı

Telegramda izləyin