Roma Papasının tövbə səfəri: "Cinsi istismara görə üzr istəyirəm"

Roma Papası Fransisk Kanadadakı katolik kilsəsinin internat məktəblərində fiziki və cinsi zorakılığa məruz qalan yerli sakinlərdən üzr istəyib. O, Kanadaya tövbə ziyarəti məqsədilə gəlib.

Sonxeber.az Teleqraf.com-a istinadla xəbər verir ki, Papa səfərinin ilk dayanacağı olan Alberta ştatının Edmonton şəhərindəki yerli sakinlərlə görüşüb. Tədbirdə Kanada baş naziri və ştatın qubernatoru Meri Saymon da iştirak edib.
Papa Fransisk katolik kilsəsinin Kanadanın internat məktəb sistemində oynadığı rola görə açıq şəkildə üzr istəyərək deyib: "Mən burada sizin aranızdayam, çünki tövbə ziyarətində ilk addım yenidən bağışlanma diləmək, bir daha bunu söyləməkdir. Mən bir çox xristianların yerli xalqlara zülm edən güclərin müstəmləkəçilik zehniyyətini dəstəkləməsinə təəssüflənirəm. Mən çox üzr istəyirəm. Bilin ki, mən bu ölkənin hər bölgəsində yerli xalqların yaşadığı əzab, travma və çətinliklərdən xəbərdaram. Bu tövbə səyahəti boyu sözlərim hər bir yerli icma və fərd üçündür. Hamınızı sevgi ilə qucaqlayıram".

Qeyd edək ki, Papanın üzrü Həqiqət və Barışıq Komissiyasının hərəkətə keçmə çağırışlarından yeddi il sonra gəldi.

Kanadadakı keçmiş internat məktəbində adı açıqlanmayan 215 məzarın tapılmasından sonra Papanın üzr məqsədi ilə Kanadaya gəlməsi üçün təzyiqlər artmışdı. Hadisədən sonra ölkənin bir çox keçmiş internat rayonlarında oxşar qəbirlər tapılıb.

Telegramda izləyin