"Bolt" sürücüləri sərnişinləri incidir - Şirkət rəhbərliyi isə standart cavablarla yola verir...

Son günlər "Bolt" taksi xidməti ilə bağlı şikayətlərin sayı artmaqdadır. Sosial şəbəkələrdə də bu barədə çoxsaylı şikayətlərə rast gəlirik. Şikayətin böyük hissəsi bu taksi şirkətinin sürücülərinin kartla ödənişə deyil, daha çox nəğd ödənişli sifarişlərə üstünlük verməsi ilə bağllıdır.

Kartla ödənişi seçdikdə, sürücülər ya gəlmirlər, ya da yenidən nəğd ödənişlə sifariş edilməsini tələb edirlər. Əks halda sərnişini gedəcəyi yerə aparmaqdan imtina olunur. Sifariş ləğv edildiyi halda da sərnişinin kart hesabından əlavə pul tutulur.

Digər şikayətlər isə, sifariş olunduğu zaman tətbiqdə bir qiymətin, mənzil başına çatdıqda isə daha yüksək qiymət və sərnişinin yükü olduğu zaman qeyri-qanuni şəkildə "baqaj pulu" tələb olunmasından ibarətdir.

Şikayətlərlərlə bağlı "Bolt" şirkəti ilə də əlaqə saxladıq. Sözügedən məsələ ilə bağlı Redaktor.az-a danışan "Bolt"un Azərbaycandakı təmsilçiliyinin məkdaşı Viktoriya Prilutska qeyd etdi ki, kart ödənişləri ilə olan sifarişlərin ləğv edilməsi sürücünün platformada xalının azalmasına səbəb olur. Bu da, sürücünün ümumi reytinqinə təsir etdiyinə görə gələcəkdə onun platformadan kənarlaşdırılması ilə nəticələnə bilər. Məhz bu səbəbdən sürücülər nəğd ödənişə üstünlük verirlər.

"Gedişin dəyəri baza tarifi (avtomobilin götürmə məntəqəsinə gəlməsinin dəyəri), daşıma zamanı üçün gediş haqqı, yürüş və dinamik əmsallar əsasında formalaşır. Sürücü tətbiqdə təyinat nöqtəsinə daxil olduğu zaman, o, gedişin təxmini dəyərini görür. Lakin, avtomobil hansısa bir səbəbə görə təyinat nöqtəsinə gecikirsə və yaxud da sərnişin alternativ marşrut təklif edib, səfər zamanı təyinat yerini dəyişirsə, bu halda yekun qiymət fərqli ola bilər".

Göründüyü kimi, məsələnin mahiyyətinə dəxıi olmayan standart bir cavab...

Nəqliyyat eksperti Elməddin Muradlı da sözü gedən məsələyə münasibət bildirərkən, taksi fəaliyyəti sahəsində ciddi problemlərin olduğunu təsdiqlədi və bunun birdəfəlik həlli üçün artıq hökümət tərəfindən yeni qanunvericilik aktı üzərində iş getdiyini dedi. Onun sözlərinə görə, taksi fəaliyyəti ilə bağlı yeni qanun qəbul ediləcək.

Ekspert onu da əlavə etdi ki, bu gün Azərbaycanda nəğd ödənişlərdən imtina ilə bağlı dövlət cəviyyəsində təbliğat-təşviqat işlərinin aparıldığı bir vatxda taksi sürücülərinin nəğd ödəniş tələb etməsi düzgün deyil:

"Dövlət Vergi Xidməti, Mərkəzi bank, Maliyyə Nazirliyi bu istiqamətdə müəyyən aksiyalar keçirir və online ödəniş məsələsini önə çıxarır. "Bolt" kimi xarici taksi şirkətləri var ki, bunlar Azərbaycanda nümayəndəlik açaraq, fəaliyyət göstərir və bizim qanunlara qarşı çıxırlar. Taksi fəaliyyəti ilə bağlı monopoliya yaradır, qiymətlərin süni şəkildə şişirdilib-azaldılması siyasəti yürüdürlər. Bu azmış kimi sürücüləri asılı vəziyyətdə saxlayıb, istismar edirlər. Onların etdikləri qanunsuz hərəkətlərdir. VətəndaşlarIarın da şikayət edə biləcəyi yer yoxdur. Vətəndaş hara şikayət edə biləcəyini və yaranan problemlərin hansı formada həll olunacağını bilmir. Şikayət olunsa da, sürücü müstəqil adamdır, şirkət ilə sadəcə əməkdaşlıq edir. Burda rəsmi əmək müqaviləsi yoxdur. Bu halda sürücülər taksi xidməti şirkətindən bir növ asılı vəziyyətdə qalırlar.Bu problemləri həll etmək üçün qanunvericilikdə kökündən dəyişiklik etmək lazımdır ki, vətəndaş sürücüdən narazı olduğu halda hara şikayət edəcəyini bilsin. Sürücü də öz növbəsində bilməlidir ki, onun hüquqlarını harada qoruyacaqlar.

Və hər şey qanun-qayda çərçivəsində olmalıdır. Bu gün taksi fəaliyyəti ilə bağlı xaos hökm sürür və bu da onların bir nəticəsidir.".

Telegramda izləyin