"Bu, cinayətdir və məsuliyyət Ermənistan dövlətinin üzərinə düşür" - Deputat

"Laçın şəhərinin, Zabux və Sus kəndlərinin boşaldılması ilk növbədə Azərbaycan Prezidenti İlham Əliyevin apardığı hərbi-diplomatik siyasətin nəticəsidir".

Bu sözləri Sonxeber.az-a açıqlamasında deputat Nəsib Məhəməliyev deyib.

O vurğulayıb ki, həmin yaşayış məntəqələrinin boşaldılması 10 noyabr üçtərəfli razılaşmada nəzərdə tutulsa da, erməni tərəfi müxtəlif bəhanələrlə ərazini tərk etmək istəmir:

"Məsələ ondadır ki, işğala qədər orada ümumiyyətlə ermənilər yaşamayıb. Onlar işğal dövründə Livandan, Suriyadan gətirilən və beynəlxalq hüququn prinsiplərinə zidd olaraq, qanunsuz məskunlaşdırılan ermənilərdir. Hüquqi baxımdan bu, cinayətdir və məsuliyyət Ermənistan dövlətinin üzərinə düşür".

Deputat qeyd edib ki, Qarabağda yaşayan ermənilərin istifadə etdikləri yol Laçın şəhərindən keçdiyi üçün alternativ yolun tikilməsi zərurəti yarandı və Azərbaycan hökuməti qısa zaman ərzində şəhərdən kənar yeni yol inşa etdi:

"Ermənistan isə, öhdəliyə əsasən, öz ərazisində yolun qalan hissəsini tikməli idi. Hətta Prezident İlham Əliyevin həmin 9 km yolun bizim şirkətlər tərəfindən inşa olunmasını təklif etməsinə baxmayaraq, ermənilər razılıq vermədilər. Əksinə, təxribatlar törətdilər və bizim əsgərimiz şəhid oldu. Bundan sonra Ali Baş Komandan "Qisas" əmri verdi və ermənilər ciddi itkilər verdilər. "Dəmir Yumruğ"un yerində olduğunu görən ermənilər dərhal avqust ayının sonuna qədər köçmək üçün vaxt istədilər. Əfsuslar olsun ki, burada da əsl erməni xisləti özünü büruzə verdi. Bəzi evlər, meşələr yandırıldı, ərazilər minalandı. İrəvanda mitinqlər başladı. Beynəlxalq müstəvidə böhtan, qarayaxma kampaniyası başladı. Ancaq əbəs yerə. Ermənilər birdəfəlik anlamalıdırlar ki, belə təxribatların axırı yoxdur. Zaman Azərbaycanın lehinə işləyir və addım-addım, çətinliklə də olsa, ölkəmiz öz halal haqqına sahib çıxacaq. Emənistan üzərinə götürdüyü öhdəlikləri yerinə yetirməli, sülh danışıqlarına başlamalıdır. Əks halda, gələcəyi müəmmalıdır".

Aysel Yusifqızı

Telegramda izləyin