"Evlərin çıxarışı olmadığına görə büdcə vergidən məhrum olur"

"Bu gün Bakı və Abşeron ərazisində çıxarış ala bilməyən 500mindən artıq fərdi həyət evləri var. On minlərlə torpaq sahələri var ki, həmin torpaq sahələrinin çıxarışları yoxdur. Həmin torpaq sahələri ya zamanında bələdiyyələr tərəfindən, ya icra hakimiyyətləri və yaxud da hansısa kalxoz və savxoz tərəfindən satılmış torpaqlardır ki,həmin torpaqlara çıxarışın alınması ciddi problem olaraq bu günə qədər gəlib çatıb".

Bu barədə əmlak məsələləri üzrə ekspert Elnur Fərzəliyev danışıb. Onun sözlərinə görə, vətəndaşlar çıxarış ala bilmədikdə məhkəmələrə müraciət edirlər. Bələdiyyənin vətəndaşa satdığı torpaq sahəsi əksər hallarda hər hansısa başqa bir qurumun balansında olduğuna görə, məhkəmə belə vətəndaşa kömək edə bilmir. Ekspertin sözlərinə görə, bu cür proseslər dövlətə də zərər vurur.

"Bakı şəhərində hər ay minlərlə alqı-satqı baş verir ki, həmin alqı-satqıların böyük hissəsi çıxarışı olmayan fərdi həyət evlərinin üzərindən aparılır. Çıxarış olmadıqda isə həmin mənzillərin satışı notarial qaydada aparıla bilmir. Pul banka köçürülə bilmədiyinə görə, bundan banklar faydalana bilmir. Digər tərəfdən, alqı-satqı olan zaman çıxarış varsa, vətəndaşlar dövlətə vergi ödəyirlər və çıxarış olmadığına görə dövlət büdcəsi vergidən məhrum olur",- deyə ekspert qeyd edib.

Elnur Fərzəliyev bildirib ki, ötən il və ondan əvvəlki ildə prezidentin tapşırığı ilə 400-ə qədər yeni tikili binaya çıxarış verilib. Həmin binalar demək olar ki, ölkə başçısının əhv fərmanına düşdü. Çünki, bəzi binalar var idi ki, 10 ildən çox müddət çıxarış ala bilmirdilər. Bu baxımdan hazırda çıxarış ala bilməyən bir çox yeni tikili binalarda mənzillər var ki, vətəndaşlar uzun müddət mənzillərində yaşamalarına baxmayaraq, qeydiyyata düşə bilmirlər.

"Azərbaycanda xarici vətəndaşın bir mənzil alması üçün mütləq şəkildə həmin mənzilin çıxarışı olmalıdır. Azərbaycana digər ölkələrdən, şərq ölkələrindən gələn turistlər alıcı və daşınmaz əmlak müştərisinə çevrilə bilər. Təəssüf olsun ki, onlar bəyəndikləri ərazilərdə çıxarış olmadığına görə yatırım edə bilmirlər. Bu da o deməkdir ki, ölkəmizə xarici ölkələrdən gələn 100 milyonlarla valyuta bizim ölkəmizdən yan keçir, və digər qonşu ölkələrə yönəlmiş olur" - deyə ekspert əlavə edib./Bizimyol.info

Telegramda izləyin