Müəllimlər imtahan olunmalıdırmı? - ARAŞDIRMA

İstiqamət: Elmi-kütləvi, mədəni-maarif, təhsil proqramlarının hazırlanması
Azərbaycanda müəllim olmaq istəyən namizədlər əvvəlcə MİQ imtahanından keçməlidirlər. İşə qəbul olduqdan sonra isə diaqnostika, hər 5 ildən bir serifikasiya imtahanları verirlər.
Bəziləri bunu təhsilin inkişafı üçün uğurlu addım saysa da, bəziləri təhsilverənin də təhsilalan kimi tez-tez imtahan olunmasının müəllimin nüfuzuna xələl gətirdiyini düşünürlər.

Təhsil eksperti Elçin Əfəndi Sonxeber.az-a bildirib ki, təhsil müəssisəsində müəllimin daha çox yüklənməsi, vaxtın düzgün bölünməməsi, əmək haqqının azlığı müəllimləri müəyyən istiqamətlər üzrə təlimə cəlb etməmək müəllimin nüfuzuna xələl gətirir. Amma MİQ, Diaqnostika, Sertifikasiya imtahanlarını bura daxil edə bilmərik:
"Bu gün Azərbaycan müəlliminin nüfuzuna xələl gətirəcək addımlar atılıb, amma buna MİQ, Diaqnostika, Sertifikasiya imtahanlarını daxil edə bilmərik. Bu, dünyanın əksər ölkəsində keçirilən prosesdir. Fransa, Hollandiya, ABŞ-da da keçirilir. Müəllimin nüfuzuna xələl gətirəcək faktor deyil. Təhsil müəssisəsində müəllimin daha çox yüklənməsi, vaxtın düzgün bölünməməsi, əmək haqqının azlığı müəllimləri müəyyən istiqamətlər üzrə təlimə cəlb etməmək və s. müəllimin nüfuzuna birbaşa təsir edəcək amillərdir. Bu gün müəllimlərin əmək haqqı normal olarsa, daha çox canıyananlıq nümayiş etdirərlər. Bu hər bir müəllimə şamil olunmur. Vicdanlı müəllimlər çoxdur. Amma bəzi müəllimlər kapitalizm dövrünün tələbinə uyğun davranıb yanına hazırlığa gəlməyən uşaqlara bir qədər fərqli yanaşırlar. Bu da müəllimin nüfuzuna xələl gətirir".

Təhsil eksperti Elçin Süleymanlı bildirib ki, bütün dünyada ən xırda bir fəaliyyətlə məşğul olmaq üçün sertifikasiyadan keçmək lazımdır. İmtahanlar keyfiyyətə yönələn adddımdır:
"Təhsilverənlərin imtahan ediməsi keyfiyyətə yönələn addımdır. Düşünürəm ki, müəllimlərin nüfuzunun aşağı düşməsi ilə əlaqəsi yoxdur. Biz övladlarımızı məktəbə göndəririksə, arzu edirik ki, müəllimlər savadlı, bacarıqlı olsunlar. Bunu da ölçməyin yolu imtahanlardır. Çünki əvvəlki illərdə saxta diplomlu müəllimlər var idi. Bütün dünyada ali təhsilin diplomu birbaşa işə girməyə təsir göstərmir. Diplom sadəcə imtahana buraxılmaq üçün sənəddir. Amma imtahanın şəkli dəyişə bilər, müsahibə mərhələsi daha təkmilləşdirilib müxtəlif şanslar verilə bilər. Dediyim kimi bütün dünyada ən xırda bir fəaliyyətlə məşğul olmaq istəyirsinizsə, onun sertifikasiyasından keçmək lazımdır. Əvvəlcə təlim verilir, sonra o təlim ölçülür. Təlim 1 saat da ola bilər, 1 ay da. Müəllimlərin imtahandan keçməsi topladığı bala görə maaşlarının artırılması alqışlanılacaq addımdır. Aşağı bal toplayanlara da şans verilməlidir, öz üzərində işləməlidirlər. Müəllimlərin özünü inkişaf etdirmək üçün çox yaxşı fürsətdir. Müəllimlər imtahana girəcəklərinə görə daha məsuliyyətli olurlar, kitab oxuyurlar, özlərini inkişaf etdirirlər. Düzdür, müəyyən subyektiv mənfi hallar ola bilər. Bəzi şəxslər imtahanda bilik və bacarığını tam göstərməyə bilər. Müsahibə mərhələsi subyektivliklə nəticələnə bilər. Amma bu xırda faizə görə bütün prosesi tənqid etmək düzgün deyil. Müəllimlərin MiQ, diaqnostika nəticəsində kifayət qədər müəllimlər tanındı. Müəllimləri irəli çəkdilər, məktəb direktoru oldular, daha yaxşı məktəblərə transfer oldular. Bu rəqabət digər müəllimlər üçün də stimul oldu".

Material Azərbaycan Respublikasının

dəstəyi ilə hazırlanmışdır.
Şəbnəm Lətifi

Telegramda izləyin