Orxanın konsertinə 12 saata 2500 bilet satıldı - FOTO

Uzun zamandır ABŞ-da yaşayan reper Orxan Zeynallı 6 il aradan sonra Bakıda səhnəyə çıxacaq.

BiG.AZ-ın məlumatına görə, keçmiş "HOST" qrupunun "AİD" ləqəbli üzvü ötən gecə "40-cı paralel" adlı konsert verəcəyini açıqlayıb.

Belə ki, 20 noyabrda "Elektra Events Hall"da keçiriləcək tədbir türk müğənni Edisin rekordunu təzələyib: 12 saat ərzində konsertə 2500-dən çox bilet satılıb.

Bu barədə repçinin özü şəxsi "İnstagram" səhifəsinin "Hekayələr" bölümündə paylaşım edərək bildirib.

Daha öncə paylaşdığı postda isə Orxan bu sözləri yazıb:

"6 il, 21 yeni mahnı, 7 yeni klipdən sonra nəhayət ki, gözlənilən gün gəldi çatdı. Mənim yaradıcılığım 2019-cu ildə "40-cı Paralel" mahnısı ilə "əvvəl" və "sonra"ya bölündü. Eyni adlı konsert isə, ümid edirəm ki, həyatımın dönüş nöqtəsi olacaq. 15 illik musiqi karyeramın hesabatı. Ən əsası, illərlə paylaşdığımız sevgi və doğmalığın görüş nöqtəsi. Bu yolda mənlə olan hər kəsə minnətdaram".

Qeyd edək ki, O.Zeynallı musiqi fəaliyyətinə 2007-ci ildə başlayıb. HOST-un tərkibində 5 il ərzində 100-lərlə mahnının, 50-dən çox konsert və çıxışların həyata keçməsində fəal şəkildə iştirak edib. Qrup üzvləri 2012-ci ildən etibarən solo fəaliyyətə başlayıb. Orxanın ilk solo albomu "Biz İnsan Deyilik" adlanıb və 2010-cu ildə ilk dəfə olaraq görüşlər vasitəsi ilə satılıb.

O, "Hekayəm", "40-cı paralel", "Mavi qızılgüllər", "Karusel", "Yadımda deyilsən", "Bəlkə də nə vaxtsa" kimi hitlərin müəllifidir.

Telegramda izləyin