"Frenk Pallone kimilərin cəfəngiyat açıqlamaları Azərbaycan-Ermənistan münasibətlərinin daha da gərginləşməsinə xidmət edir"- Aydın Hüseynov

Xəbər verdiyimiz kimi, ABŞ Nümayəndələr Palatasının üzvü Frenk Pallone bildirib ki, Azərbaycan sülh müqaviləsinin iştirakçısı kimi anlamalıdır ki, "Dağlıq Qarabağ"ın statusu var. Orada erməni mədəniyyətini və xalqını qoruyub saxlamaq üçün ona hansısa muxtariyyət verilməlidir.

Bununla bağlı Sonxeber.az-a danışan deputat Aydın Hüseynov bildirib ki, ermənipərəst senator yenə köhnə havalara oynayır:

"ABŞ-ın Nümayəndələr Palatasının üzvü Frenk Pallone deyib ki, Azərbaycan sülh müqaviləsinin iştirakçısı kimi anlamalıdır ki, "Dağlıq Qarabağ"ın statusu var və orada erməni mədəniyyətini və xalqını qoruyub saxlamaq üçün ona hansısa muxtariyyət verilməlidir. Bu həmin ermənipərəst senatordur ki, 44 günlük Vətən müharibəsində Azərbaycanı təcavüzkar dövlət adlandırmışdı. Pallone hətta işğal dövründə Qarabağa qanunsuz səfər etdiyinə görə Azərbaycan XIN tərəfindən 2017-ci ildə arzuolunmaz şəxslər siyahısına daxil edilmişdi. Amma indi Azərbaycan işğala son qoyub".

Deputat qeyd edib ki, bu gün reallıqlar fərqlidir və bu reallıqda şərtləri Azərbaycan diktə edir:

"Azərbaycanda "Dağlıq Qarabağ" adlı ərazi yoxdur, Qarabağ var! Orada yaşayan etnik ermənilərin isə heç bir imtiyazı yoxdur, olmayacaq da. Okeanın o tayından səslənən bu kimi cəfəng açıqlamalar Azərbaycanla Ermənistan arasında münasibətlərin normallaşmasına yox, əksinə, gərginləşməsinə xidmət edir".

Aysel Yusifqızı

Telegramda izləyin