"Azərbaycan Avropa üçün həm dost, həm də tərəfdaş ölkə olaraq çox mühüm strateji bir ölkəyə çevrilib"- DEPUTAT

Azərbaycanın uğurlu xarici siyasəti artıq Avropa ilə münasibətlərdə də özünü göstərir. Prezident İlham Əliyevin Macarıstan səfərində biz bunun bir daha şahidi olduq. Azərbaycan Avropa üçün həm dost, həm də tərəfdaş ölkə olaraq çox mühüm strateji bir ölkəyə çevrilib".

Bunu Sonxeber.az-a açıqlamasında Milli Məclisin deputatı Vüqar İskəndərov deyib.

O bildirib ki, Prezidentin Macarıstana etdiyi rəsmi səfərdə bu ölkənin Azərbaycana olan münasibətindən hər şey məlum olur.

"Artıq Azərbaycanla təkcə Macarıstan yox, bir neçə Avropa ölkəsinin müxtəlif platformalarda tərəfdaşlıq fəaliyyəti mövcuddur. Əlbəttə, bunların ən əsası qaz resurslarıdır. Uzun illər Azərbaycan öz qaz resurslarını Avropa bazarlarına çatdırmaq üçün fəal çalışırdı və nəticə etibarilə iki il bundan əvvəl Cənub Qaz Dəhlizi icra edildi. Qeyd olunduğu kimi, bu çox müasir enerji infrastrukturudur, uzunluğu 3500 kilometrdir və artıq iki ildir ki, Azərbaycan Avropa İttifaqı məkanına öz təbii qaz resurslarını çatdırır. Ancaq biz bundan sonra da qaz təchizatının daha çox olması üçün müəyyən işlər görəcəyik. Prezidentin Macarıstan səfərində qeyd olunduğu kimi ötən il Avropa Komissiyası ilə imzalanmış sənədə əsasən, Azərbaycan qaz təchizatını iki dəfə, hətta ondan da çox artırmağı planlaşdırır. Bunun üçün resurslar da, siyasi iradə və tərəfdaşlarla təmaslar da mövcuddur. Bu gün dünyada enerji təhlükəsizliyi məsələsi çox aktual bir mövzudur. Bu baxımdan Azərbaycan sadiq və etibarlı tərəfdaş olaraq Avropanın diqqət mərkəzindədir. Azərbaycanın zəngin neft-qaz resursları imkan verir ki, təbii qazla bağlı ən azı yüz il bundan sonra Avropa üçün etibarlı tərəfdaş olsun. Bütün bunlar isə illər öncə prezident lham Əliyevin yürütdüyü uğurlu siyasətin nəticəsində yaranıb. Gələcəyə hesabanlanmış yaşıl enerji ilə bağlı da Azərbaycanda atılan addımlar tez bir zamanda bu sahədə də uğurlarımızın artacağından xəbər verir. Yaşıl enerji ilə bağlı olan və artıq icra olunan layihələr Azərbaycanı Avropa üçün daha da yaxın edəcək. Ötən ay imzalanmış sazişə əsasən, Azərbaycan yaşıl enerjisini Avropaya çatdıracaq. Nəticədə Avropa qitəsinin enerji təhlükəsizliyi daha dolğun və əhatəli şəkildə təmin ediləcək. Avropanın enerji təhlükəsizliyində Azərbaycanın vacib tərəfdaş kimi rol alması bizim üçün daha geniş imkanlar yaradacaq".
AYSEL YUSİFQIZI

Telegramda izləyin