"Yaşım az olsa da, balalarım həmişə yanımda olublar" - Cəbrayıl Dövlətzadənin anası

"Çox pozitiv uşaq idi. Mən övladlarımla ana kimi yox, dost kimi olmuşam. Övladlarımın 3-ü ilə də belə olmuşam. Kiçik oğlumun 15 yaşı var, qızım isə 25 yaşın içindədir. 3-ü də mənə dost olublar. Yaşım az olsa da, balalarım həmişə yanımda olublar".

BiG.AZ xəbər verir ki, bu sözləri ATV kanalında yayımlanan "Zaurla Günaydın" proqramında Vətən müharibəsi şəhidi Cəbrayıl Dövlətzadənin anası Məleykə Məmmədzadə deyib.

"Cəbrayıl qardaşına, bacısına və mənə dayaq olub. İki qardaşım rəhmətə gedib. Biri 17, digəri 27 yaşında rəhmətə gediblər. Qardaşım yoxdur. Oğlum elə bil ki, mənim qardaşım idi, hər şeyim idi. Hər kəsi onun yerinə qoymuşdum. O tamam başqa uşaq idi. Uşaqlıqdan çox kişi xüsusiyyəti var idi, kişi xarakterli idi. Hər şeyə can atan, nəyisə deyirdin ki, bunu elə edirdi, bacarmadığı iş yox idi. Hər bir şeyi bacarırdı. Özü istəyirdi ki, nəsə əldə etsin".

Anası bildirib ki, Cəbrayıl həmişə tanınmaq istəyib və ifaçı olmaq arzusunda olub. O, uşaq vaxtından işləyib və ailəsinə dəstək olub.

"Həmişə xoşu gəlirdi ki, adı-sanı çıxsın. Tanınmağı çox xoşlayırdı.

Heç vaxt acımı göstərən biri olmamışam. Sevmirəm ki, kimsə mənlə bərabər üzülsün, məyus olsun. Hər zaman içimdə çəkirəm acını. Amma həmişə qürur duyuram ki, belə bir övladım olub. Həmişə adımı, başımı uca edən, hər zaman özünü elə göstərib ki, yəni tək olsaq da, adı, sanı ilə, pis hərəkətlər etməyən biri olub. Mənim oğlum o qədər ağıllı, tərbiyəli uşaq olub ki, istəməyib anası əziyyət çəksin. 12 yaşından işləyib, mənə kömək olub. İlk dəfə restoranda ofisiant işləyib. Bir manatına kimi evə gətirirdi. Əziyyətlə də böyütsəm, mənim uşaqlarım həmişə gəşəng geyiniblər, həmişə də gözəl görünüblər. Heç kəsin yanında məyus olmayıblar. Hər zaman geyimləri, keçimləri ilə seçiliblər".

Qeyd edək ki, Cəbrayıl Dövlətzadə 2020-ci ilin 28 sentyabrında Cəbrayıl-Füzuli istiqamətində gedən döyüşlərdə xüsusi təyinatlıların tərkibində döyüşərək böyük şücaət göstərib, erməni generalını və polkovnikini öldürərkən 19 yaşında şəhid olub.

Telegramda izləyin