Türkiyədəki zəlzələyə görə Azərbaycan quru sərhədləri aça bilər? - AÇIQLAMA

Türkiyədə baş verən zəlzələ fonunda Azərbaycanın quru sərhədlərini açması məsələni yenidən gündəmə gətirir. Bildiyimiz kimi, təyyarə biletlərinin baha olması zəlzələ zonasında, eləcə də təhlükə altında olan şəhərlərdə olan soydaşlarımızın vətənə qayıtmasına çətinlik yaradır. Bununla əlaqədar olaraq quru sərhədlərin açılması insanların rahat və münasib qiymətə ölkəyə gəlməsinə kömək edə bilər.

Bununla əlaqədar olaraq Azərbaycanın quru sərhədləri açması gözlənilirmi?

Mövzu ilə bağlı Milli Məclisin deputatı Vüqar Bayramov BiG.AZ-a açıqlmasında bildirib ki, bununla bağlı qərarın verilməsi birbaşa epidemioloji gözləntidən asılı olaraq həyata keçiriləcək:

"Azərbaycanın Gürcüstan daxil olmaqla digər qonşu ölkələrlə quru sərhədləri açması birbaşa Nazirlər Kabineti yanında Operativ Qərargahın qərarından asılı olacaq. Operativ Qərargah mütəmadi olaraq ölkədaxili, eləcə də qonşu ölkələrdəki vəziyyətlə bağlı məlumatın əldə edilməsi və qiymətləndirilməsini həyata keçirir.

Hər halda bizim təklifimiz mərhələli şəkildə quru sərhədlərin açılması ilə bağlıdır. Nəzərə alsaq ki, qonşu ölkələrdən hazırda Rusiyada yoluxma sayı yüksəkdir. İranda praktiki olaraq prosesin nəzarətdən çıxması müşahidə olunur. Bu baxımdan düşünürəm ki, Azərbaycanla Gürcüstan arasındakı quru sərhədin açılması məsələsinin müzakirəsi mümkündür. Amma təbii ki, bununla bağlı qərarın verilməsi birbaşa epidemioloji gözləntidən asılı olaraq həyata keçiriləcək. Operativ qərargah tərəfindən bu istiqamətdə qiymətləndirmə aparıldıqdan sonra qərarın qəbul edilməsi və addımların atılacağı istisna deyil. Amma təbii ki, bütün hallarda quru sərhədlərin açılması iqtisadi baxımdan vacibdir. Bu baxımdan da epidemioloji vəziyyət tənzimlənən həddə olduğu halda bununla bağlı qərarların veriləcəyi gözlənilir".

Telegramda izləyin