Finlandiyadan Türkiyəyə 3000 nəfərlik çadır göndərilib

Finlandiya Türkiyəyə zəlzələ ilə əlaqədar 3000 nəfərlik sığınacaq yardımı göndərib.

Sonxeber.az xəbər verir ki, Finlandiya Daxili İşlər Nazirliyindən verilən yazılı açıqlamaya görə Kahramanmaraşda baş verən zəlzələlərdən sonra 3000 nəfərə çadır yardımı edilib.

Yardımın ilk hissəsi fevralın 11-də NATO-nun Avro-Atlantik Fəlakətlərə Cavab Koordinasiya Mərkəzi vasitəsilə çatdırılıb, Türkiyəyə göndərilən yardıma isə qızdırılan çadırlar və sobalar daxildir.

Finlandiyanın daxili işlər və müdafiə nazirlikləri yardımın maddi-texniki təminatı üzərində birgə işləyiblər.

Xilasetmə işləri üçün bölgəyə qruplar göndərən Avropa İttifaqının Mülki Müdafiə Qrupunun tərkibində Finlandiyadan 3 mütəxəssis, Texniki Dəstək Qrupunun tərkibində isə 4 mütəxəssis xilasetmə işlərinə cəlb olunub.

"Bildiyimiz qədər on minlərlə insan həlak olub və dağıntılar böyükdür. Zəlzələdən zərər çəkmiş bölgələrdə sığınacaqlara böyük ehtiyac var. Finlandiya maddi yardım göndərməklə insanların əsas ehtiyaclarını ödəyir" ,- Finlandiyanın daxili işlər naziri Krista Mikkonen

Qeyd edək ki, Finlandiya Suriyada zəlzələdən zərər çəkənlərə maliyyə yardımı hazırlayır.

Şəbnəm Lətifi

Telegramda izləyin