İran Suriyaya hava hücumundan müdafiə sistemi ixrac edəcək

İranın Bəşər Əsəd rejimi ilə İsrailin hava hücumlarına qarşı Suriyaya "Khordad 15" hava hücumundan müdafiə sistemi və elektron döyüş texnikası ixracı ilə bağlı razılığa gəldiyi bildirilib.
Sonxeber.az xəbər verir ki, Suriyadan yüksək səviyyəli hərbi rəsmilər, o cümlədən Əsəd rejiminin müdafiə naziri Əli Mahmud Abbas bu yaxınlarda İrana səfər edib.

Səfər çərçivəsində Tehran və Əsəd rejiminin İsrailin hava hücumlarına qarşı İrandan Suriyaya hava hücumundan müdafiə və elektron döyüş texnikası ixracı mövzusunda razılığa gəldiyi bildirilib.

"Suriya hava hücumundan müdafiə şəbəkəsini və döyüş təyyarələri üçün dəqiq idarə olunan bombaları yenidən konfiqurasiya etməlidir. Biz çox güman ki, Suriyanın hava hücumundan müdafiəsini gücləndirmək üçün İran radarlarının və Xordad 15 sistemi kimi müdafiə raketlərinin Suriyaya tədarükünün şahidi olacağıq", - deyə məlumatda bildirilir.

İranın müdafiə naziri Məhəmməd Rza Aştiani fevralın 22-də Tehranda suriyalı həmkarı Abbas ilə görüşündə deyib ki, "Suriyanın müdafiə qabiliyyətini artırmaq üçün bütün imkanlardan istifadə edilməlidir".

İran 2019-cu ilin iyun ayında "Khordad 15" adlı yerli hava hücumundan müdafiə sistemini təqdim edib.

2011-ci ildən İsrail xüsusilə Suriyada İranın dəstəklədiyi qüvvələrə qarşı tez-tez hava zərbələri endirir.

Telegramda izləyin