Veteran müəllim: "Şagirdlərimə Vətən müharibəsi ilə bağlı həm də şahid kimi danışıram"

1992-ci il fevralın 25-dən 26-na keçən gecə Ermənistan silahlı qüvvələri tərəfindən Rusiyanın 366-cı motoatıcı alayının iştirakı ilə Xocalı şəhərində soyqırımı törədilib. Soyqırımı nəticəsində 106 qadın, 63 uşaq, 70 qocanın həyatına son qoyulub. 1 275 dinc sakin əsir götürülüb, onlardan 150 nəfərin taleyi hələ də məlum deyil. 475 nəfər şikəst olub. 8 ailə bütünlüklə məhv edilib. 25 uşaq hər iki valideynini, 130 uşaq isə valideynlərindən birini itirib. Azərbaycan xalqı heç zaman həmin faciəni və insanların başına gətirilən dəhşətləri unutmayıb və unutmayacaq. Xalq oğullarını unutmadığını 44 günlük Vətən müharibəsində də sübut edib. Azərbaycanın igid və qəhrəman oğulları işğal altında olan torpaqlarımızı canı və qanı bahasına olsa belə geri qaytardı, Xocalının qisasını aldı. Həmin igidlərdən biri də Vətən mübaribəsi iştirakçısı, Azərbaycan dili və ədəbiyyat müəllimi kimi fəaliyyət göstərən Elvin Mirabbaszadə olub.

E.Mirabbaszadə "Report"a açıqlamasında Aprel döyüşlərinin də iştirakçısı olduğunu söyləyib.

Qəhrəman müəllim Tovuz döyüşləri zamanı müharibə olarsa, ordu sıralarında döyüşmək üçün könüllü olaraq yazılıbmış. O, Tovuz döyüşlərində general Polad Həşimovun itkisinin çox ağır təsir etdiyini bildirib. Buna görə də torpaqlarımızın geri qaytarılmasında və şəhidlərimizin qisasının alınmasında payının olmasını arzulayıb:

"Elə oldu ki, sentyabrın 27-də müharibə başladı. Həmin dönəmdə mən liseylərdən birində Azərbaycan dili və ədəbiyyatı müəllimi kimi fəaliyyət göstərirdim. Ayın 28-i mənə çağırış gəldi. Artıq ayın 29-da ön xəttə yollandıq və qısa müddətdə təlimlərdə iştirak etdik. Təlimlərdən sonra artıq bizim istiqamətlərimiz bəlli oldu. Biz əvvəlcə Goranboy və Tərtərin Barambat meşəsi adlanan ərazisində yerləşdik. Əmr gəldikdən sonra isə Talış və Suqovuşan istiqamətinə getdik. Cəbhədə ilk alınan postlara yerləşir və oranın mühafizəsini təşkil edirdik".

Vətən mübaribəsi iştirakçısının sözlərinə görə, qələbənin qazanılmasında və düşmənə layiqli cavabın verilməsində əsas amillərdən biri Azərbaycan Ordusunun gücü və anaların dualarıdır: "Döyüşə yollanan zaman anam mənə oxumağım üçün dua kitabı vermişdi. Kitabı verəndə dedi ki, bunu hər gün oxuyarsan. Geri dönənə qədər həmin kitabı ürəyimin üstündə yerləşən cibdə saxlayırdım, onu oxuyub özümü daha güvəndə hiss edirdim. Çox şükür, ordumuzun gücü sayəsində müharibəni qələbə ilə başa vurduq".

Şagirdlərə Vətən müharibəsindən şahid kimi danışan müəllim

Qəhrəman müəllim deyir ki, bu gün şagirdlərinə torpaqlarımızın azad olunmasından həm də şahid kimi qürurla danışır: "Bu gün şagirdlərimə 30 illik həsrətin bitdiyindən, Azərbaycan Ordusunun şücaətindən iftixarla bəhs edirəm. Qarabağ probleminin şagirdlərimə, bizdən sonrakı nəslə qalmadığına görə çox sevinirəm. Şagirdlərimlə söhbətdə gələcək nəslin də necə vətənpərvər ruhda böyüdüyünü hiss edirəm. Bəzən uşaqlar böyüyüəndə hərbçi olacağını və vətənin keşiyində dayanacağını bildirir. Bu, məni çox qürurlandırır. Şükürlər olsun ki, biz bu qələbəni qazandıq. Mən indi onlara azad Qarabağdan, keçdiyim müharibə yolundan fəxrlə danışıram və deyirəm nə yaxşı ki, bu qələbənin qazanılmasında mənim də payım var".

Qeyd edək ki, Elvin Mirabbaszadə döyüşlərdə göstərdiyi qəhrəmanlıqlara görə "Vətən müharibəsi iştirakçısı" medalı ilə təltif edilib.

Telegramda izləyin