Avtomobilinə ziyan vurulan və hücuma məruz qalan NİGAR CAMALDAN YENİ AÇIQLAMA - VİDEO

Ötən gün yolu kəsilərək avtomobilinə ziyan vurulan "Avroviziya" təmsilçimiz müğənni Nigar Camal açıqlama yayıb.

BAKU.WS xəbər verir ki, sənətçi baş vermiş hadisədən sonra izahat və şikayət ərizəsi yazdığını və hüquq-mühafizə orqanlarının yaşadığı hadisəyə düzgün hüquqi qiymət verəcəyini bildirib:

"Ötən gün şikayətimdən sonra məsələ dərhal nəzarətə götürüldü. Bu gün isə izahat və şikayət ərizəsi yazdım. Hazırda məsələ hüquq-mühafizə orqanlarının nəzarətindədir. Məsələyə düzgün hüquqi qiymət veriləcəyindən əminəm. Belə həssas bir məsələdə yardım əlini gözlədiyimdən də tez uzatdığı üçün Daxili İşlər Nazirliyinin rəhbərliyinə və əməkdaşlarına, həmçinin Bakı Şəhər Baş Polis İdarəsinin rəhbərliyinə və əməkdaşlarına dərin təşəkkürümü bildirirəm. Azərbaycan xanımına və vətəndaşına yüksək dəyər nümayiş etdirdikləri üçün minnətdaram".

Xatırladaq ki, ötən gün müğənni Nigar Camal avtomobili hərəkət edərkən hücuma məruz qalıb. Belə ki, "KİA" markalı avtomobili idarə edən şəxs yolunu kəsib və müğənninin avtomobilinə ziyan vurub.

"Müğənni Nigar Camalın avtomobilinə hücum edən şəxs müəyyən olunub və polis əməkdaşlarının keçirdiyi tədbirlərlə saxlanılıb", - deyə BAKU.WS-in sorğusuna cavab olaraq Daxili İşlər Nazirliyinin mətbuat xidmətinin əməkdaşı Nurlan Əliyev bildirib.

Telegramda izləyin