Türkiyə Yunanıstanda qatar qəzasında ölənlərə görə başsağlığı verib

Türkiyənin Xarici İşlər Nazirliyi Yunanıstanda baş verən qatar qəzasında həyatını itirənlərlə bağlı başsağlığı mesajı yayıb.

Sonxeber.az xəbər verir ki, nazirlikdən verilən açıqlamada Yunanıstanda dünən gecə baş verən qatar qəzasında çox sayda insanın həyatını itirməsi və yaralanması kədərlə qarşılandığı bildirilib.

"Bu faciəvi qəzada həyatını itirənlərin yaxınlarına, Yunan xalqına və hökumətinə başsağlığı verir, yaralananların tezliklə sağalmasını arzulayırıq", - deyə məlumatda bildirilir.

Yunanıstan Dövlət Agentliyinin AMNA xəbərinə görə, Larisa şəhərinin şimalındakı Tempi bölgəsində sərnişin qatarı ilə yük qatarı toqquşub.

Sərnişin qatarının bəzi vaqonlarının relsdən çıxması ilə nəticələnən qəzada azı 32 nəfər ölüb, 85 nəfər yaralanıb.

Xarici işlər naziri Mövlud Çavuşoğlu da Yunanıstanın xarici işlər naziri Nikos Dendias ilə telefonla danışıb və qatar qəzası ilə bağlı başsağlığı verib.

Telegramda izləyin