"Təxribatlar dayandırılmasa Ermənistan üçün bunun nəticələri çox ağır olacaq" - DEPUTAT

Xəbər verdiyimiz kimi martın 5-də Xankəndi-Xəlfəli-Turşsu torpaq yolundan istifadə edilməklə Ermənistan Respublikasından hərbi ləvazimatların, silah-sursatın və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınmasının həyata keçirilməsi baradə operativ məlumatlar daxil olub. Daxil olmuş məlumatın yoxlanması məqsədilə qanunsuz hərbi daşınmalar həyata keçirən nəqliyyat vasitələri Azərbaycan Ordusunun bölmələri tərəfindən saxlanılaraq yoxlanılmasına cəhd göstərilib.Qarşı tərəfdən atəş açılıb və baş vermiş atışma nəticəsində hər iki tərəfdən həlak olan və yaralananlar var.

Qeyri-qanuni erməni birləşmələrinin törətdikləri təxribat nəticəsində Azərbaycan Ordusunun hərbi qulluqçuları Əlibəyli Şəhriyar Ramiz oğlu və Hüseynov Eşqin Cəmil oğlu şəhid olublar.

Bununla bağlı Sonxeber.az-a danışan deputat İqbal Məmmədov bildirib ki, qanunsuz erməni silahlı birləşmələrinin təxribatları regionda vəziyyəti gərginləşdirməklə yanaşı, sülh müqaviləsinin imzalanmasına maneə məqsədi daşıyır:

"Martın 5-də qanunsuz erməni silahlı birləşmələrin törətdiyi təxribat nəticəsində şəhid olan hərbi qulluqçularımıza Allahdan rəhmət diləyirəm. 44 günlük Vətən müharibəsində biabırçı şəkildə məğlub olan Ermənistan hələ də təxribatçı və təcavüzkar siyasətindən əl çəkmək istəmir. Xankəndi-Xəlfəli-Turşsu torpaq yolundan istifadə edilməklə Ermənistan Respublikasından hərbi ləvazimatların, silah-sursatın və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınması 2020-ci ilin 10 noyabrında imzalanan üçtərəfli Bəyanatın kobudcasına pozulmasıdır. Azərbaycan 2020-ci il noyabrın 10-da imzalanan üçtərəfli Bəyannamənin bütün bəndlərinə uyğun olaraq, öz üzərinə düşən öhdəlikləri yerinə yetirir. Ermənistan isə iki ildən çox vaxt keçməsinə baxmayaraq, müxtəlif bəhanələrlə üzərinə düşən öhdəlikləri yerinə yetirməkdən boyun qaçırır. Eləcə də Rusiya sülhməramlıları".

Deputat vurğulayıb ki, Rusiya sülhməramlıların gözü qarşısında Azərbaycan torpaqlarına Ermənistan Respublikasından hərbi ləvazimatların, silah-sursatın və şəxsi heyətin daşınması açıq-aşkar 2020-ci il noyabrın 10-da imzalanan üçtərəfli Bəyannamənin pozulmasıdır:

"İki ildən çoxdur ki, Rusiya sülhməramlılarından Azərbaycan torpaqlarında gizlənən qanunsuz erməni silahlı birləşmələrinin çıxarılmasını tələb etsək də onlar üzərlərinə düşən öhtəliyi icra etmir və terrorçuların rahat fəaliyyəti üçün şərait yaradırlar.

Cənab prezident İlham Əliyev dəfələrlə Ermənistan rəhbərliyinə və ermənilərin xaricdəki havadarlarına xəbərdarlıq etmişdir ki, əgər Azərbaycana qarşı nəinki silahlı təxribat, hətta təxribat xarakterli bəyanatlar versələr belə, nəticəsi çox ağır olacaq. Ermənistan təxribatlarına davam edərsə Azərbaycan Qarbağda yenidən antiterror əməliyyatlarına başlaya bilər. Ermənistan hökuməti cəbhədə vəziyyəti gərginləşdirməklə ciddi səhvə yol verir. Təxribatlar dayandırılmasa Ermənistan üçün bunun nəticələri çox ağır olacaq".

Aysel Yusifqızı

Telegramda izləyin