İsrail qüvvələri bir fələstinlini öldürüb

İsrail əsgərləri işğal altındakı İordan çayının qərb sahilində Əl-Bireh şəhərində bir fələstinlini öldürüb. İlin əvvəlindən İsrail qüvvələrinin və yəhudi köçkünlərin hücumları nəticəsində həlak olan fələstinlilərin sayı 89-a yüksəlib.

Sonxeber.az xəbər verir ki, Fələstin Səhiyyə Nazirliyi 23 yaşlı Yezen Ömər Hasibin Bireh şəhərinin şimal girişində İsrail qüvvələri tərəfindən vurulduğunu açıqlayıb.

Fələstin xəbər agentliyi WAFA, Hasibin vurulduqdan sonra İsrail tərəfindən nəzarətə alındığını və Qızıl Ayparanın təcili yardım maşınlarının fələstinlini xəstəxanaya aparmasına icazə verilmədiyini bildirib.

Məlumatda həmçinin qeyd olunub ki, İsrail qüvvələri Bireh şəhərinin şimal girişini bütün giriş-çıxışlara bir saatlıq bağlayıb.

Fələstin Qızıl Aypara Cəmiyyəti verdiyi açıqlamada həyatını itirən Hasibin cənazəsinin İsrail nəzarət-buraxılış məntəqəsindən aparılacağını açıqlayıb.

Digər tərəfdən İsrail ordusu və yəhudilərin işğal altındakı İordan çayının qərb sahilinə təşkil etdiyi hücumlarda ilin əvvəlindən bu yana həyatını itirən fələstinlilərin sayı 89-a çatıb.

Telegramda izləyin