"Rəcəb Tayyib Ərdoğan parlament seçkilərində əzici üstünlüklə qalib gəldi" - ŞƏRH

Türkiyədə 28 may seçkiləri bütünlüklə bölgə üçün mühüm əhəmiyyət daşısa da, 14 may parlament və prezident seçkiləri öncəsindəki kritik situasiya mövcud deyil. İlk olaraq ona görə ki, cənab Rəcəb Tayyib Ərdoğan parlament seçkilərində əzici üstünlüklə qalib gəldi, prezident seçkilərində isə əsas rəqibini 3 milyona yaxın səslə üstələdi. Bu mənada böyük vədlərlə meydana çıxan və daha çox Qərbin iradəsini ifadə edən Millət İttifaqı faktiki olaraq seçkiyə yıpranmış şəkildə, ruh düşkünlüyü ilə daxil olur.

"Sirr deyil ki, Türkiyə prezident respublikası olsa da, parlament ənənələri və hakimiyyət iyerarxiyasında qanunverici orqanın rolu çox güclüdür. Parlament isə artıq milli iradənin - Cümhur İttifaqının, yəni Ərdoğanın nəzarətindədir. Belə olan halda Kılıçdaroğlu hətta seçkilərdə qalib gəlsə belə davamlı və dayanıqlı fəaliyyət mümkün olmayacaq. Amma Millət İttifaqının tək problemi parlamentdə nəzarət imkanlarına malik olmamaları deyil. Məlumdur ki, Millət İttifaqının heyəti - 7-li masanı təşkil edən siyasətçilərin hər biri ayrılıqda siyasi hakimiyyətə iddialıdır və onları yalnız Ərdoğan şəxsiyyəti ilə mübarizə müvəqqəti birləşdirib. Yəni ilk imkanda Millət İttifaqı dağılmağa məhkumdur".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, belə bir situasiyada Kılıçdaroğlu hakimiyyətə gələrsə, məhz müttəfiqlərinin siyasi iddiaları səbəbindən təkbaşına prezidentlik edə bilməyəcək və bu da ciddi hökumət böhranına səbəb olacaq.

"Yəni Kılıçdaroğlunun quracağı hökumət öncədən dağılmağa məhkumdur və əgər 28 may seçkilərində Kılıçdaroğlu və müttəqəfiqləri qalib gələrsə, yaşanacaq siyasi böhran ən qısa müddətdə növbədənkənar seçkiləri zərurətə çevirəcək. Əslində situasiyanı müxalifətdəkilər özləri də anlayır və onlarda ruh düşkünlüyünün də əsasında dayanan amillərdən biri budur. Bu mənada Ərdoğanın parlamentdə böyük gücə sahib olduğu və prezident seçkilərində də əsas favorit olduğu bir şəraitdə digər qüvvələrin neytral qalıb-qalmaması, yaxud Cümhur İttifaqını dəstəkləyib dəstəkləməməsi Türkiyə üçün uzaq perspektivdə nəyisə dəyişməyəcək".

Telegramda izləyin