Torpaqşünaslıq və Aqrokimya İnstitutunda 125 min manat necə və hara xərclənib?

Torpaqşünaslıq və Aqrokimya İnstitutu 2023-cü ilin avqust ayının 7-də sifarişçi olduğu növbəti satınalmaya yekun vurub.

Sonxeber.az xəbər verir ki, İnstitutun "Dəftərxana və təsərrüfat xərcləri" lotu üzrə keçirdiyi 24.905 manatlıq satınalmada "NUR TƏCHİZAT VƏ XİDMƏT" Məhdud Məsuliyyətli Cəmiyyəti qalib elan edilib.

"NUR TƏCHİZAT VƏ XİDMƏT" MMC 2023-cü ilin may ayının 5-də dövlət qeydiyyatına alınıb. Şirkətin hüquqi ünvanı Suraxanı rayonu, Hövsan qəsəbəsi Gənclik ev 7, mənzil 4 ünvanı, qanuni təmsilçisi isə Yusifzadə Nərmin Tahir qızıdır.

Nizamnamı kapitalı 2 manat olan "NUR TƏCHİZAT VƏ XİDMƏT" MMC-nin lisenziya və fəliyyət profilləri barədə heç bir məlumata rast gəlinmir.

Torpaqşünaslıq və Aqrokimya İnstitutunun 2022-ci ildə sifarişçi olduğu bəzi satınalmalarda şübhəli məqamlar yer alır.

İnstitutun keçirdiyi bu satınalmaların ümumi məbləği 125.391 manat təşkil edir.

Naməlum MMC necə qalib elan edilib?

Torpaqşünaslıq və Aqrokimya İnstitutu 2022-ci ilin sentyabr ayının 19-da "Dəftərxana və təsərrüfat xərcləri" lotu üzrə satınalmaya yekun vurub. Bu satınalmanın məbləği 24.799 manat, qalibi isə "OFFİCE GENİUS NM" Məhdud Məsuliyyətli Cəmiyyəti olub. "OFFİCE GENİUS NM" MMC-nin hüquqi ünvanı Bakı şəhəri, Nəsimi rayonu, Süleyman Rüstəm ev 55, mənzil 48 ünvanı, qanuni təmsilçisi isə Quliyev Elnur Kamil oğludur. Nizamnamə kapitalı 5 manat olan "OFFİCE GENİUS NM" MMC-nin fəaliyyət profili, müvafiq lisenziyaları barədə məlumat yoxdur.

"Otkad" əməliyyatlarında adı çəkilən MMC qalib olub

Torpaqşünaslıq və Aqrokimya İnstitutu 2022-ci ilin oktyabr ayının 19-da daha iki lot üzrə sifarişçi olduğu satınalmaya yekun vurub. Bu satınalmaların ümumi məbləği 28.265 manat olub. İnstitutun "İstehlak yönlü müxtəlif xidmətlər" lotu üzrə sifarişçi olduğu satınalmanın məbləği 14.940 manat, qalibi isə "GEONDA FM" Məhdud Məsuliyyətli Cəmiyyəti olub.

İnstitutun həmin gün, yəni 2022-ci ilin oktyabr ayının 19-da yekun vurduğu smetası 13.325 manat olan "Mətbəə məhsulları üzrə xərclər" lotu üzrə keçirilən satınalmada da "GEONDA FM" Məhdud Məsuliyyətli Cəmiyyəti qalib elan edilib.

"GEONDA FM" MMC 2022-ci ilin iyun ayında dövlət qeydiyyatına alınıb. Şirkətin hüquqi ünvanı Səbail rayonu, Abbasqulu Abbaszadə ev 1/B, qanuni təmsilçisi Məhərrəmov Rövşən Baldadaş oğludur.

"GEONDA FM" MMC-nin fəaliyyət profili, lisenziyaları, faktiki ünvanı barədə açıq internet resurslarında heç bir məlumat yoxdur.

Əldə etdiyimiz məlumata görə şirkətin qanuni təmsilçisi Məhərrəmov Rövşən Baldadaş oğlu "proxy" şəxsdir. Belə ki, bu şəxsin adına 50-dən artıq MMC-nin rəsmiləşdirildiyi və bu MMC-lərin dövlət satınalmalarında qaranlıq əməliyyatlarda istifadə edildiyi bildirilir.

Daha bir satınalma - Daha bir şübhəli MMC

Torpaqşünaslıq və Aqrokimya İnstitutu 2022-ci ilin noyabr ayının 14-də "Abadlaşdırma xidmətləri haqqının ödənilməsi" lotu üzrə daha bir satınalmanı yekunlaşdırıb. Smetası 19.917 manat olan satınalmada "SƏMA 98 CORP" Məhdud Məsuliyyətli Cəmiyyəti qalib elan edilib.

"SƏMA 98 CORP" MMC 2022-ci ilin iyun ayının 20-də dövlət qeydiyyatına alınıb. Şirkətin hüquqi ünvanı Qaradağ rayonu, Lökbatan qəsəbəsi, ev 30, mənzil 8 ünvanı, nizamnamə kapitalı isə 10 manatdır.

Torpaqşünaslıq və Aqrokimya İnstitutunda abadlıq işləri aparacaq "SƏMA 98 CORP" MMC-nin işçi qüvvəsi, fəaliyyət profili, lisenziyaları, maddi-texniki bazası, faktiki ünvanı barədə məlumat yoxdur.

İlginc məqam isə "SƏMA 98 CORP" MMC-nin qanuni təmsilçisinin Torpaqşünaslıq və Aqrokimya İnstitutuna yad olmamasıdır. Belə ki, "SƏMA 98 CORP" MMC-nin qanuni təmsilçisi bir ay əvvəl İnstitutun keçirdiyi iki satınalmada qalib elan edilən "GEONDA FM" MMC-nin qanuni təmsilçisi Məhərrəmov Rövşən Baldadaş oğludur.

Qeydiyyat tarixi və ünvan: Təsadüf, yoxsa maxinasiya labirinti?

Torpaqşünaslıq və Aqrokimya İnstitutu 2022-ci ilin noyabr ayının 29-da "Sair torpaq, tikili və avadanlıqların satın alınması" lotu üzrə daha bir satınalmaya yekun vurub. Bu satınalmanın məbləği 27.505 manat, qalibi isə "DELTA 10 LT" Məhdud Məsuliyyətli Cəmiyyəti olub.

"DELTA 10 LT" MMC Torpaqşünaslıq və Aqrokimya İnstitutu 2022-ci ilin noyabr ayının 14-də "Abadlaşdırma xidmətləri haqqının ödənilməsi" lotu üzrə keçirdiyi satınalmada qalib elan edilən "SƏMA 98 CORP" MMC ilə eyni tarixdə - 2022-ci ilin iyun ayının 20-də dövlət qeydiyyatına alınıb.

Şirkətin hüquqi ünvanı Torpaqşünaslıq və Aqrokimya İnstitutu 2022-ci ilin noyabr ayının 14-də "Abadlaşdırma xidmətləri haqqının ödənilməsi" lotu üzrə keçirdiyi satınalmada qalib elan edilən "SƏMA 98 CORP" MMC-nin hüquqi ünvanı ilə eynidir - Qaradağ rayonu, Lökbatan qəsəbəsi, ev 30, mənzil 8.

Bu şirkətin də qalib elan edilən digər təşkilatlar kimi fəaliyyət profili barədə məlumatlar yoxdur. Əld etdiyimiz məlumata görə "DELTA 10 LT" MMC-nin qanuni təmsilçisi Sultanova Vüsalə Vaqif qızının da "proxy" şəxs olduğu, adına da onlarla MMC təsis edildiyi, bu MMC-lərin dövlət satınalmalarında müxtəlif şəxslər tərəfindən istifadə edildiyi deyilir.

Qeyd edək ki, Torpaqşünaslıq və Aqrokimya İnstitutunun baş direktoru professor Əlövsət Quliyevdir./Qlobal.az