"TEXNOFEST"in Azərbaycanda daimi keçirilməsi üçün layihə hazırlanır

"Azərbaycanın elm və texnologiyalar sahəsində istedadlı gəncləri çoxdur".

Bunu "Report"n Ankara bürosuna "TEXNOFEST" festivalında "Furqanoğlu Dəmir Yumruq" stendinin Türkiyə təmsilçisi Melih Erdem deyib.

Onun sözlərinə görə, Azərbaycandan "TEXNOFEST"ə böyük maraq var: "Bu il festivala 1 milyondan çox iştirakçı qatılıb. Türkiyədən sonra ən çox iştirakçı isə Azərbaycandandır. Texnologiya sahəsi ilə bağlı azərbaycanlı gənclər arasında istedadlılar çoxdur. İştirak üçün Azərbaycanın müxtəlif bölgələrindən müraciət edirlər, şərtlərlə maraqlanırlar. Məsələn, keçən il gənclərdən biri süni intellekt vasitəsilə işarə dili proqramı quraşdırıb. Mən onu çox bəyəndim. Digər bir gənc meşə yanğınlarını söndürmək üçün dron hazırlayıb. Başqa biri isə dəniz suyundan hidrogeni ayırıb yanacaq əldə edib. Robort it quraşdıranlar da var. Azərbaycanda həqiqətən yüksək səviyyəli proqramçı gənclər az deyil. Bu məni çox məmnun edir. Bu layihələrin təkrar tətbiqi üçün sərmayə qoyulsa, fikrimcə, daha böyük fayda əldə olunar".

M.Erdem bildirib ki, iki il öncə Sumqayıt Dövlət Universitetinin (SDU) tələbələri ilə əməkdaşlığa başlayıblar: "TEXNOEST" haqqında müəllim və tələbələrə məlumat verdik. Məlumatlarımız maraq doğurdu və əməkdaşlığa başladıq".

Ekspert onu da əlavə edib ki, hazırda "TEXNOFEST"in Azərbaycanda daimi keçirilməsi üçün layihələr üzərində çalışırlar.

Telegramda izləyin