"Mənəvi cəhətdən inkişaf etmək istəyiriksə, keçmişimizdən xəbərdar olmalıyıq" - Psixoloq

İstiqamət: Dini və milli tolerantlıq, millətlərarası münasibətlərin inkişaf etdirilməsi

"İnsanların mənəvi inkişafı ana bətnindən başlayır. Bəzi valideynlər var ki, uşaqlara qayğını həddən artıq çox göstərir, bəziləri isə heç qayğı vermir. Ona görə də mənəvi inkişaf və tərbiyə ailə tiplərindən asılıdır".

Bu sözləri Sonxeber.az-a açıqlama verən Dərya Tədris və Psixologiya Mərkəzinin rəhbəri, psixoloq Gülnar Orucova deyib.

O bildirib ki, insanlara ən yaxşı şeyləri vermək onları mənəvi cəhətdən inkişaf etdirmək demək deyil:

"Bətində olan körpəni ana necə hiss edirsə, körpə də onu elə hiss edir. Ona görə də uşaq olmağa hazırlaşan dövrdə həmişə müəyyən musiqilərin dinlənilməsini, kitabların oxunulmasını, kədərlənməməyi və.s. məsləhət görürlər. Bunlar edildiyi zaman dünyaya gələn uşaq da həmin vərdişlərə alışıq olur.

Bəzən ana telefonla çox oynadığı zaman görürük ki, 3 aylıq uşaq da telefonu valideynlərindən də çox sevir.

Bəzi valideynlər elə bilirlər ki, uşaq universitetə hazırlaşırsa, bütün gün dərs oxumalıdır. Belə olmaz: 3 saatdan çox oxunan dərs səmərəli olmur. Valideynlərin uşaqlara "mən müəllimə pul verirəm, səni hazırlaşdırıram, sən oxumalısan" kimi sözləri deməsi düzgün deyil. Valideyn düşünməlidir ki, həmin uşağa mənəvi rahatlıq, mənəvi inkişaf lazımdır.

Bu gün biz övladlarımıza bahalı telefon alaraq, restoranlara apararaq, onları inkişaf etdirmiş olduğumuzu düşünürük. Lakin bu, heç də belə deyil. Düzür, çox gəzən çox bilər, amma uşaqlarımızı da gəzdirdiyimiz yerlərə diqqət etməliyik.

İnsanları mənəvi cəhətdən inkişaf etdirmək istəyiriksə, uşaqlarımızı inkişaf etdirməliyik. Uşaqları muzey, teatr, qoruqlara, tarixi yerlərə aparmalıyıq. İnsanın mənəviyyatı bəzən onun adət-ənənələrinə dayanır. Övladlarımızı tərbiyə etmək üçün keçmişə dönməliyik. Çünki insanın mənəvi inkişafı onun kökünə dayanır. İnsanlara ən yaxşı maddi şeyləri vermək onları mənəvi cəhətdən inkişaf etdirmək demək deyil.

Bu gün xidmət səviyyələri "sıfır" olan 700-800 manatlıq bağçalar var. Burada uşaqlara "Montessori təlimi"ndən başqa heç nə öyrətmirlər. Bu təlimin əsasında isə odur ki, uşaq özü nələrisə kəşf edir. Halbuki uşaqların normal inkişafı varsa, bu şeyləri evdə də edə bilər. Ona görə də, bu gün vacib olan uşaqların əlindən planşeti, telefonu alıb, televizora müəyyən bir hədd qoyaraq faydalı alışqanlıqlar yaratmaqdır. Uşaqları mənəvi cəhətdən inkişaf etdirmək istəyən valideynlər öz köklərini, dəyərlərini yaxşı bilməlidir. Bunlar çox önəmlidir. Uşaqlar bütün gün dərs oxumaq məcburiyyətində deyillər. Müəyyən vaxtlar ayrılmalıdır ki, uşaq həmin vaxtlarda dərs oxusun, qalan zaman isə istirahət etməlidir".

Material Azərbaycan Respublikası

Medianın İnkişafı Agentliyinin maliyyə

dəstəyi ilə hazırlanmışdır.

Aytəkin Cəlali

Telegramda izləyin

instagramda izləyin