Minaya düşərək həlak olan şəxs 2 övlad atası olub - YENİLƏNİB

Minaya düşərək həlak olan şəxs 2 övlad atası olub.

Oxu.az-ın məlumatına görə, Ağstafa rayonunda minaya düşərək həlak olan, Qazax rayonunun Ürkməzli kənd sakini, 1986-cı il təvəllüdlü Rəsul Şahin oğlu İbrahimov ailəli olub, 2 övladı var.

Hadisə nəticəsində ağır xəsarətlər alan 1982-ci il təvəllüdlü Sahib İzor oğlu Əmrahov isə onun xalası oğludur.

Zərərçəkən Qazax Diaqnostika Mərkəzinin cərrahiyyə şöbəsinə yerləşdirilib, tibbi yardımlar davam etdirilir.

17:54

Ağstafa rayonunun Ceyrançöl ərazisində hərbi sursatın partlaması nəticəsində bir nəfər ölüb, digər şəxs isə xəsarət alıb.

Oxu.Az xəbər verir ki, bu barədə Daxili İşlər Nazirliyi, Baş Prokurorluq və Minatəmizləmə Agentliyinin (ANAMA) mətbuat xidmətlərinin birgə məlumatında bildirilib.

Qeyd olunub ki, hadisə noyabrın 15-də baş verib. Qazax rayonunun Dəmirçilər kənd sakini, 1986-cı il təvəllüdlü Rəsul Şahin oğlu İbrahimov və Daşsalahlı kənd sakini, 1982-ci il təvəllüdlü Sahib İzbor oğlu Əmrahov partlamamış hərbi sursata müdaxilə ediblər. Nəticədə partlayış baş verib.

Hadisə zamanı Rəsul İbrahimov aldığı xəsarətlərdən həyatını itirib. Sahib Əmrahov isə xəsarət alıb.

Faktla bağlı Ağstafa Rayon Prokurorluğunda araşdırma aparılır.

ANAMA, DİN və Baş Prokurorluq bir daha vətəndaşları təhlükəsizlik qaydalarına riayət etməyə, şübhəli əşyalara toxunmamağa və partlayıcı sursatlara müdaxilə etməməyə çağırıb.

17:52

Ağstafada minaya düşərək ağır yaralanan şəxsin kimliyi məlum olub.

Oxu.Az-ın əldə etdiyi məlumata görə, Ceyrançöl ərazisində minanın partlaması nəticəsində ağır xəsarət alan şəxs 1982-ci il təvəllüdlü S.Əmrahovdur.

O, xəstəxanaya yerləşdirilib.

17:16

Ağstafada minaya düşərək həlak olan şəxs qohumlarının yanına qonaq gedibmiş.

Oxu.Az-ın əldə etdiyi məlumata görə, Ağstafa rayonunun Ceyrançöl ərazisində minaya düşərək həlak olan Rəsul Şahin oğlu Məmmədov Qazax rayonunun Ürkməzli kəndindəndir. O, Ağstafaya əmisi oğlunun yanına qonaq gedibmiş.

Onların hansı şəraitdə minaya düşdükləri hələlik dəqiq məlum deyil.

Faktla bağlı araşdırma aparılır.

17:02

Azərbaycanda iki nəfər minaya düşüb. Onlardan biri həlak olub, digəri isə yaralanıb.

Oxu.Az-ın əldə etdiyi məlumata görə, hadisə Ceyrançöl adlanan ərazidə baş verib.

Hadisə nəticəsində Qazax rayon sakini Rəsul Məmmədov həyatını itirib. Digər şəxsin yaralandığı bildirilir. Onun kimliyi dəqiqləşdirilir.

Telegramda izləyin