"Ağdam-Xankəndi yolunun açılması Azərbaycanın növbəti qələbəsidir" - DEPUTAT

"Ağdam-Xankəndi yolunun açılması Azərbaycanın növbəti qələbəsidir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, bu gün Rusiya Qızıl Xaç Cəmiyyətinin (QXC) Qarabağdakı erməniəsilli sakinlərə göndərdiyi yardım maşını artıq Xankəndiyə çatıb:

"Ermənistanın qondarma rejiminin təxribatlarına baxmayaraq, RQXC tərəfindən göndərilən yükün Ağdam-Xankəndi yolu ilə keçməsini bu yolun açılması istiqamətində atılan müsbət addım və mühüm irəliləyiş kimi qiymətləndirə bilərik.

Təəssüf ki, Ermənistan tərəfi 3 ilə yaxındır ki, üçtərəfli bəyanatla üzərlərinə götürdükləri öhdəlikləri icra etmir və qanunsuz erməni silahlı birləşmələri Qarabağda qalmaqdadır. Ermənistan və havadarları müxtəlif təxribatlarla regionda vəziyyəti gərginləşdirməyə çalışırlar. Ağdam-Xankəndi yolunun açılması bu istiqamətdəki planların iflasa uğraması deməkdir. Belə ki, Ağdam-Xankəndi yolunun açılması ermənilərin ölkəmizə qarşı elan etdikləri "Humanitar müharibə"-nin bizim qələbəmizlə sonlanmasıdır".

Deputat vurğulayıb ki, Azərbaycanın razılığı Xankəndi-Ağdam yolu açıldı:

"Bu yolun açılması bir daha göstərdi ki, Azərbaycan ərazisinə istənilən təyinatlı yük və yardım yalnız Azərbaycanın tərəfinin icazəsi və onun təklif etdiyi marşrutla daşına bilər. Yaxşı olardı ki, Ermənistan Azərbaycanın hər cəbhədəki qələbəsi ilə barışıb, bizim şərtlərimizlə hazırlanan sülh müqaviləsini imzalasın".

Telegramda izləyin