Deputat: "Azərbaycan diplomatiyası Fransanın çirkin planlarının qarşısını alacaq"

"Prezident İlham Əliyev və Azərbaycan diplomatiyası yenə də Fransanın çirkin planlarının qarşısını alacaq və Brüssel təxribatının baş tutmasına imkan verilməyəcək".

Sonxeber.az-ın xəbərinə görə, bunu Milli Məclisin deputatı Azay Quliyev parlamentin bu gün keçirilən plenar iclasında çıxışı zamanı deyib.

Deputatın sözlərinə görə, Avropa Şurasının Nazirlər Komitəsinin oktyabrın 18-də Strasburqda keçirilən iclasında Avropa İttifaqının nümayəndə heyəti Ermənistan-Azərbaycan münasibətləri ilə bağlı bəyanatla çıxış edib: "Bu bəyanatın tonundan və məzmunundakı bəzi qıcıqlandırıcı məqamlardan aydın olur ki, bu kağız parçası yenə də Fransanın təkidi ilə qəbul edilib. Çünki burada Azərbaycanın antiterror tədbirləri, bu tədbirlərin həyata keçirilməsini zəruri edən amillər, Qarabağ erməniləri ilə bağlı ölkəmizin bu günə kimi atdığı müsbət addımlar və reinteqrasiya səyləri haqqında heç nə yoxdur. Əksinə, bəyanatda yenə də "Dağlıq Qarabağ" və "blokada" kimi əsassız və artıq ikrah hissi doğuran ifadələrə yer verilib".

Telegramda izləyin