Dövlət Sosial Müdafiə Fondunun investisiya hədəfi açıqlanıb

Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu (DSMF) və İşsizlikdən Sığorta Fondunun sərbəst vəsaitlərinin investisiyaya yönəldilməsinə dair qanunvericilik paketi artıq hazırlanıb.

Bu barədə əmək və əhalinin sosial müdafiəsi naziri Sahil Babayev Milli Məclisin Əmək və sosial siyasət və İqtisadi siyasət, sənaye və sahibkarlıq komitələrinin birgə iclasında deyib.

"Aydındır ki, DSMF-nin ehtiyatları daha böyükdür. Işsizlikdən Sığorta Fodunun ehtiyatları isə daha kiçikdir. Ona görə də aralarında böyük bir məbləğ fərqi var. Paket olaraq hər ikisi hazırdır. DSMF artıq investisiya fəaliyyətinə başlayıb. Artıq kapital bazarlarına təqribən 800 milyon manat həcmində investisiya edilib. Bu əsasən çox konservativ bir yanaşma ilə aparılır. Belə fondların təcrübəsindən də irəli gələrək ilk olaraq investisiya fəaliyyəti konservativ investisiya aləti ilə getməlidir", - nazir bildirib.

Onun sözlərinə görə, DSMF-in sərbəst vəsaitləri əsasən dövlət qiymətli kağızlarına, 5 %-i isə banklara yönəldilib: "Gəlirlilik dərəcəsi isə 8,1 - 8,3 % ətrafındadır".

S. Babayev bildirib ki, dövlət qiymətli kağızlarının satışı açıq hərraclar vasitəsilə keçirilir:

"DSMF də bu hərraclarda iştirak edir. Qaydaların iyun ayında təsdiqindən sonra avqustdan etibarən investisiyaya başlanıldı. Qaydalara əsasən, investisiya ancaq dövlət qiymətli kağızlarına, dövlət zəmanətli qiymətli kağızlara, 5 % həcmində bəlli kriteriyalara uyğun gələn, müvafiq rezervləri olan banklara, repo və əks-repo əməliyyatlarına yatırıla bilər. Bunlardan başqa yerlərə investisiya edilməsi səlahiyyəti bu gün nə DSMF-də var, nə də İşsizlikdən Sığorta Fondunda. Bu gün Azərbaycanın dövlət qiymətli kağızlarının gəlirlilik dərəcəsi kifayət qədər yüksəkdir və az risklidir. O vəsaitlərin hazırda başqa istiqamətlərə yönəldilməsi planlarımızda yoxdur.

İnvestisiyalardan əldə ediləcək gəlirin də hara yerləşdirilməsi istiqamətləri qaydalarda açıq şəkildə qeyd edilib. Burda bir neçə istiqamət var. Bunlardan birincisi sosial islahatların maliyyələşdirilməsidir".

S. Babayev əlavə edib ki, investisiyaya yönəldilən sərbəst vəsait, investisiya gəlirləri və onun istifadə olunmamış qalığı Azərbaycan Mərkəzi Bankında açılmış hesaba toplanır və onların uçotu ayrıca aparılır. Bu vəsaitlər növbəti büdcə ilinə sərbəst vəsaitin investisiyaya yönəldilən hissəsi kimi keçirilir.

Nazir vurğulayıb ki, ilin sonuna qədər 250 milyon manat əlavə investisiya edilməsi nəzərdə tutulur: "Ümumilikdə 1 milyard 50 milyon manat investisiya qoyulacaq. 8 %-dən [gəlirlilik dərəcəsi] götürsək bu investisiya ən azı 80 milyon manat gəlir gətirəcək ki, bu da imkan yaradacaq ki, ən azı min şəhid ailəsini bu vəsait hesabına mənzillə təmin edək və digər ehtiyaclara yönəldək".

Telegramda izləyin