Əsgərlər arasında intihar halları niyə artıb? - Açıqlama

Axır vaxtlar orduda intihar hallarına yenidən rast gəlinir. Bu baxımdan Müdafiə Nazirliyinin N saylı hərbi hissəsinin hərbi qulluqçusu, əsgər Şəhriyar Nizami oğlu Musayev və Bağırov Elcan Emin oğlu odlu silahdan istifadə etməklə özünü öldürməsini nümunə göstərə bilərik. Orduda əsgərlərin xidmət keyfiyyətinin artırılması istiqaməti üzrə göstərişlər verildiyi halda, əsgərlər niyə intihar edir? Bunun səbəbi nə ilə bağlıdır?

Mövzu ilə bağlı hərbi ekspert Səxavət Məmməd Sonxeber.az-a açıqlamasında bildirib ki, əsgərliyə çağırışçıların təkcə fiziki cəhətdən sağlamlığı yox, həm də onların psixoloji baxımdan yoxlanışları keçirilməlidir:

"Çünki psixoloji cəhətdən problemi olan şəxslərin hərbi xidmətə getməsi özü də bir problem yaradır. Elə çağırışçılar var ki, o ümumiyyətlə xidmət etmək istəmir. Hətta xidmətə getdikləri halda özlərini öldürəcəklərini deyirlər. Belə çağırışçıların hərbi xidmətə göndərilməsi komandiri bir növ işə salmaq deməkdir. Heç kim baxmayacaq ki, bu əsgər psixoloji baxımdan necə olub. Həmin çağırışçılar hərbi xidmətə gedir və dözə bilmir. Bu zaman intihara meyilli adam olur və özünü öldürür. Heç kim baxmayacaq ki, bu adam hər xidmətə gəlmək istəyib ya yox. Bu zaman dərhal komandirin üzərinə düşürlər ki, çağırışçı haqqında niyə tədbir görülməyib. Mən hesab edirəm ki, komandiri pis vəziyyətdə qoymamaq üçün birinci növbədə hər şeyə əvvəldən başlamaq lazımdır. Onların psixoloji vəziyyətini yoxlamaq lazımdır".

Ekspertin sözlərinə görə, getmək istəməyən çağırışçını hərbiyə göndərib, illərdir xidmət etmiş və rütbə alan bir zabiti çətin vəziyyətə salmaq lazım deyil:

"Ondansa həmin şəxsi ora göndərməmək daha yaxşı olar. Hesab edirəm ki, bu istiqamətdə işlər görülməlidir. Bu problemlərin sonu depressiyaya gətirib çıxarır. Cəmiyyətdə kifayət qədər problemlər var. İnsanların həyatları ağırdır. Zamanında Qarabağ ideologiyası var idi və artıq işğaldan azad olundu. Digər məsələlər öz həllini tapdı. Gənci müvafiq formada motivasiya etmək barəsində artıq düşünmək lazımdır. Ölkə və ordu içərisində bir motivasiyanın yaradılmasına ehtiyac var. Müdafiə Nazirliyi və digər qurumların hamısı işləməlidir. Ümumiyyətlə əsgəri və hərbçini motivasiya etməlidir ki, əsgər hansı işi görməlidir. Əsas məsələlərdən biri çağırış zamanı psixoloji vəziyyət qiymətləndirilməlidir. Elə çağırışçı var ki, onun ciddi problemləri var. Hökm deyil ki, həmin gənc xəstəxanada yatsın. Ailələr var ki, övladının psixoloji problemlərini üzə çıxartmır. Orduya sağlam adamlar götürülməlidir ki, intihar hallarının sayı azalsın".

Xatırladaq ki, hər iki intihar hadisəsi ilə bağlı Azərbaycan Respublikası Cinayət Məcəlləsinin müvafiq maddəsi ilə cinayət işi başlanılaraq şahidlər dindirilmiş, müvafiq ekspertizalar təyin edilərək icraya yönəldilmiş və təxirəsalınmaz zəruri istintaq hərəkətləri həyata keçirilmişdir.

Telegramda izləyin