Ermənistan uçuruma gedir: Laçında yalan dezinformasiya yayır, atəşkəsi pozur - Müharibə başlaya bilər?

Xəbər verdiyimiz kimi, Ermənistan silahlı qüvvələrinin bölmələri Azərbaycan Ordusunun Kəlbəcər rayonunun İstisu yaşayış məntəqəsi istiqamətində yerləşən mövqelərini atıcı silahlardan atəşə tutub. Bununla yanaşı, Ermənistan tərəfindən atəşkəs pozulub. Eyni zamanda, son zamanlar sosial şəbəkələrdə şəhid və yaralıların olması, Laçın komendant saatının elan edilməsi ilə bağlı dezinformasiyalar yayılıb. Aydındır ki, Ermənistan Brüssel görüşündən sonra, sərhədboyu təxribatları genişləndirib. Bəs sözügedən dezinformasiyalar Ermənistan tərəfindən yayılır?

Mövzu ilə bağlı Sonxeber.az-a danışan hərbi ekspert Elxan Şıxəliyev deyib ki, Ermənistan Azərbaycan ilə iki istiqamətdə vəziyyəti gərginləşdirir:

"İlk olaraq şərti sərhəd üzərində təxribatlar törətməklə atəşkəsin pozulması üzrə addımlar atır. Digər tərəfindən informasiya cəbhəsində müharibəni davam etdirir. Ermənistanın daxilində "Azərbaycandan hücumlar gözlənilir" kimi xəbərlər yayılır. Sankı onlar xalqı qorxutmaq və onları blokadada saxlatmaq üçün informasiyalar yayırlar. Bunun üzərindən Azərbaycan tərəfində müharibə öncəsi vəziyyət var kimi məsləhətlər verirlər. Bunların hamısında məqsəd Azərbaycanı təxribatlara çəkmək, aktiv əməliyyatlara aparmaq üzrə addımlar atılır. Bunun arxasında müəyyən niyyətlər var. Azərbaycan müharibəyə başlasın və qərbdəki müttəfiqlərinə desinlər ki, mövqelərimiz təhlükədədir. Ermənistan maksimum dərəcədə çalışacaq ki, təxribatları davam etdirsin. Onlar Avropa müttəfiqlərindən almaq istədiklərinə nail olmağa çalışacaqlar. Bununla yanaşı Avropadakı siyasi institutlarında Azərbaycana qarşı sanksiyaların tətbiq edilməsi üzrə addımlar atmağa çalışırlar. Ermənistanın gizli planları var və bu kimi dezinformasiyaların yayılmasında diqqətli olmaq lazımdır".

Xatırladaq ki, MEDİA və DTX sözügedən əməllərin törədilməsinin ciddi hüquqi məsuliyyətə səbəb olduğuna dair xəbərdarlıq edərək, media subyektlərini və jurnalistləri sosial şəbəkələrdə yayımlanan qeyri-dəqiq, mənbəyi bilinməyən məlumatlardan istifadə etməməyə, vətəndaşları bu kimi hallara qarşı hər zaman prinsipiallıq nümayiş etdirməyə, sosial şəbəkələrdə yayılan, rəsmi mənbələrə söykənməyən əsassız informasiyalara inanmamağa çağırır.

Sevda Səfərova

Telegramda izləyin