Ermənistanda vətəndaş itaətsizliyi: Paşinyan Azərbaycanla danışıqları DAYANDIRIR? - ŞƏRH

Xəbər verdiyimiz kimi, bu gün səhər saatlarından etibarən Ermənistanda vətəndaş itaətsizliyi aksiyası başlayıb. Aksiya "Vətən üçün Tavuş" hərəkatına dəstək məqsədilə həyata keçirilir. Təkcə ötən gün keçirilən aksiyada 150-dən çox etirazçı saxlanılıb. Hələlik qeyri-rəsmi informasiyaya görə, bu gün saxlanılanların sayı 50 nəfərə yaxındır. Sözügedən aksiyalar davam edərsə, Paşinyan Azərbaycan ilə birbaşa danışıqları dayandıracaq?

Mövzu ilə bağlı Sonxeber.az-a danışan Orta Doğu Araşdırmaları Mərkəzinin rəhbəri, siyasi şərhçi Sədrəddin Soltan bildirib ki, Azərbaycan və Ermənistan arasında əldə edilmiş razılıq təkcə iki tərəfin məsələsi deyil. Bu həm də beynəlxalq ictimaiyyətin dəstəyi və razılığı ilə əldə olunmuş bir prosesdir:

"Ermənistanda hakimiyyət dəyişikliyi baş verərsə belə, bu proses dayanmayacaq. Çünki Ermənistanda hətta yeni qüvvələr belə hakimiyyətdə qalmaq üçün qonşu dövlətlərlə münasibətləri normallaşdırmaq istiqamətində fəaliyyət göstərməlidir. Bununda əvvəli və ilki Azərbaycan ilə münasibətlərin normallaşmasından başlayır. Çünki gələcəkdə ehtimal olunan qüvvələr Azərbaycan ilə müharibə aparmaq gücündə deyil. Çünki Ermənistanın elə güclü ordusu yoxdur".

Sədrəddin Soltanın sözlərinə görə, bu tipli hadisələr və ruh yüksəkliyi ilə Ermənistanın Azərbaycana qarşı aksiyalar keçirməsi mümkünsüzdür və beynəlxalq normalar ilə qanunsuzdur:

"Artıq iki ölkə arasında sərhədlərin müəyyənləşdirilməsi istiqamətində addımlar atılır. Yeni qüvvələr sülh prosesinə qarşı çıxış etsələr özlərinə problem yaranar. Odur ki, bu aksiyalar hər hansı formada davam etsə belə danışıqlar prosesi dayanmayacaq. Bundan başqa danışıqlar prosesi həm də Nikol Paşinyanın siyasi-ideoloji hədəflərindəndir. Bunu həm də Nikol Paşinyan istəyir. Onlar bu hədəfdən çətin qayıdar. Proseslər və danışıqlar davam edəcək".

Telegramda izləyin