Anar Məmmədovun təşviqat kampaniyası qalmaqal yaratdı: "Tərtərlilərdən dəstək ala bilmir, axundları..." - FOTO

97 saylı Tərtər-Ağdərə-Goranboy seçki dairəsində qalmaqal davam edir.

Pravda.az xəbər verir ki, sözügedən seçki dairəsində hakim Yeni Azərbaycan Partiyasının namizədlərindən olan VI çağırış Milli Məclisin deputatı Anar Məmmədov barədə şikayətlərin ardı-arası kəsilmir. A.Məmmədovdan Mərkəzi Seçki Komissiyasına şikayət ünvanlayan 97 saylı seçki dairəsindəki namizədlərdən biri ictimai fəal Şəhriyar Məcidzadə bəzi faktları açıb.

"Bərdədən gələn "seçicilər"" başlığı ilə Məmmədovun təşviqat kampaniyasını tənqid atəşinə tutan Məcidzadə paylaşdığı görüntüləri belə şərh edib: "Kiçik bir araşdırma kifayət edir ki, Anar Məmmədovla görüşdə oturan və onun ətrafında gəzən adamların Bərdə və Goranboyun bizim dairəyə düşməyən bölgələrindən gəldiyi müəyyən edilsin. Yəni 97 saylı Tərtər-Ağdərə-Goranboy seçki dairəsinə düşməyən bölgələrdən gələn seçicilər olduğu müəyyən edilsin. Mən Azərbaycan vətəndaşlarının digər rayonlara getmələrinin əleyhinə deyiləm. Amma yaxşı olar ki, onlar öz rayonlarında deputatlarını seçsinlər. Konstitusiyaya görə də belədir. Məsələn, qırmızı halqa ilə işarələnmiş şəxs Bərdədə çox hörmətli Seyid Yusif Ağanın nəvəsi, Goranboyun keçmiş axundu, xətrini çox istədiyim Səbuhidir. İndi ortaya üç sual çıxır:

1. Tərtərlilərin yerinə 97 saylı Tərtər-Ağdərə-Goranboy seçki dairəsinə düşməyən bölgələrin sakinləri, o cümlədən bərdəlilərmi səs verəcək?

2. YAP-ın namizədi niyə tərtərlilərdən dəstək ala bilmir?

3. Din xadimləri siyasətəmi gəlir?

Tərtərdə seçici tapmayanda digər rayonlardan kömək çağırmaq lazım deyil. Mən Tərtərə, Ağdərə və Goranboya mütərəqqi fikirləri, elmi, yaradıcılığı təşviq etmək adına gəlmişəm".

Ş.Məcidzadə MSK-ya ünvanladığı şikayət barədə də açıqlama verib: "MSK-ya Anar Məmmədovun seçki təşviqatını əvvəlcədən başlaması ilə bağlı topladığımız faktları rəsmi məktubla avqust ayının 9-da bildirişli məktubla göndərmişəm. Surətini isə 97 saylı Tərtər DSK-sına göndərmişəm. Məktublar hələ çatmayıb. Bilirlər ki, Anar Məmmədovun namizədliyi ləğv edilməlidir. Bilirlər ki, bütün sosial şəbəkə, media bundan yazıb. Necə başa düşək, Anar Məmmədovun qayınatası milyarder Qulam Ələkbərova dövlətin qanunlarının gücü çatmır? Paylaşın, yayın. Dövlətin oliqarxiyadan güclü olmasına dəstək olun!"

Telegramda izləyin