Alimlər tarixdə ilk daş alətlərin mənşəyini açıqladılar: İnsanlar tərəfindən YARADILMAYIB

ABŞ-nin Klivlend Təbiət Tarixi Muzeyi və Kent Dövlət Universitetinin alimləri daş alətlərin yaranması ilə bağlı yeni bir hipotez irəli sürüblər. Onların fikrincə, ilk insanlar əvvəlcə təbiətdə mövcud olan iti daşlardan istifadə edib, daha sonra isə özləri alət hazırlamağa başlayıblar.

Oxu.Az-ın verdiyi məlumata görə, bu barədə araşdırmanın nəticələri "Archaeometry" elmi jurnalında dərc olunub.

Bildirilib ki, alimlər Keniya və Oman da daxil olmaqla dünyanın müxtəlif yerlərində tədqiqat aparıblar. Onlar təbiətdə çox sayda itikənarlı daşların - "naturalitlər"in mövcud olduğunu müəyyən ediblər.

Tədqiqatçılar hesab edirlər ki, ilk insanlar məhz bu iti daşlardan istifadə etdikdən sonra yeni alətlər düzəltmək fikrinə düşüblər. Bu qərarın əsas səbəblərindən biri təbiətdə kifayət qədər iti daşların olmaması və onların əldə edilməsinin çətinliyi ola bilər.

Bundan başqa, insanlar təbiətdəki daşların keyfiyyətini artırmaq üçün özləri istədikləri forma və kənarlara malik daş alətlər düzəltməyə üstünlük vermiş ola bilərlər.

Beləliklə, bu yeni hipotez daş texnologiyalarının mənşəyi haqqında əvvəlki nəzəriyyələrə nisbətən daha iqtisadi və məntiqli bir izah təqdim edir.

İndi isə arxeoloqlar bu hipotezi yoxlamaq üçün 3-6 milyon il əvvələ aid dövrlərdə "naturalitlər"in istifadəsinə dair sübutlar axtarmalıdırlar.

Telegramda izləyin